Taldyqorǵanda memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýyn talqylaý boıynsha oblystyq aktıv ótti.
Jıynǵa aımaqtaǵy ár mekemeniń basshylary, aýdan, qala ákimderi, kásipkerler, jastar, BAQ jáne partıa ókilderi men basqa da salanyń jetekshi-mamandary qatysty.
Memleket basshysynyń Joldaýynda berilegen tapsyrmalar men mindetterdi talqylap, júzege asyrý joldaryn belgileý maqsatynda ótken jıynda oblys basshysy Amandyq Batalov baıandama jasady.
Sondaı-aq, oblys ákimi aımaqta atqarylyp jatqan jáne de aldaǵy ýaqytta Joldaý aıasynda atqarylatyn jumystardy naqtylady. Aımaqta ónerkásipti órkendetip, aýylsharýashylyǵyn, orta jáne shaǵyn bıznesti damytý arqyly ekonomıkany jedel jańǵyrtýǵa bolatynyn tilge tıek etken Amandyq Ǵabbasuly:
– Halyq tutynatyn taýarlardy óndirýge baǵyttalǵan «Qarapaıym zattar ekonomıkasyn» damytý qajet. Oblys boıynsha 6,4 mlrd. teńgege 7 joba bankterdiń maquldaýyna ıe boldy. Bul kóp emes. Úkimet bolsa 600 mlrd. teńge bóldi. Sondyqtan, bul baǵdarlama qala men aýdan ákimderi jumysynyń basym baǵyty bolýy tıis. Prezıdent aıtqandaı, shaǵyn jáne orta bıznes aýyl turǵyndaryna turaqty jumys berip, jumyssyzdyqty azaıtyp, jergilikti búdjetti nyǵaıtýǵa múmkindik beredi. Sol sebepti memleket tarapynan aldaǵy ýaqytta da bızneske qoldaý kórsetiledi. «Bıznestiń jol kartasy» sheńberinde aldaǵy úsh jylda qosymsha 250 mlrd. teńge bólý josparda, – deı kele, ákim orynbasary Baǵdat Manzorovqa, kásipkerlik basqarmasyna, qala jáne aýdan ákimderine áleýmettik aspektilerge nazar aýdara otyryp, bıznesti qoldaýdyń jańa nysandaryn – birinshi kezekte kópbalaly jáne az qamtylǵan otbasylar úshin otbasylyq bıznes qurýdy tapsyrdy.
Aýylsharýashylyǵy salasy ónimdiligin arttyrý aýyldy jerlerde ómir súrýge qolaıly jaǵdaı jasaý qajettigin de eskertti. Ol úshin «Aýyl – el besigi» jobasy qolǵa alyndy. Jospard iske asyrý úshin bıyl 30 mlrd. teńge bólingen. Aldaǵy úsh jylda qosymsha 90 mlrd. teńge qarjy bólý qarastyrylǵan. Aıta keterligi, oblysta 7 mlrd. teńgege 43 joba júzege asyrylýda. Al aýyldarda 443 tirek jáne spýtnıktikpen qamtylmaq.
Memleket basshysy 3 jyl ishinde kópbalaly jáne turmysy tómen otbasylardy baspanamen qamtýdy tapsyrǵan edi. Bul baǵytqa respýblıkalyq búdjetten 240 mlrd teńge bólinbek. Osy rette, oblysymyzda «Baqytty otbasy» baǵdarlamasyna 657 januıa ótinish bergen. Onyń 286-y osy jobamen úıli boldy. Óńir basshysynyń aıtýynsha, bul jumystar áli de jalǵaspaq.
Bıyl 1447 otbasyn baspanamen qamtý kózdelip otyr. Sonymen qatar, eskirgen kópqabatty turǵyn úılerdi jóndeýden ótkizý máselesine kóńil bólinbek. Óńirimizde 3566 kópqabatty turǵyn úı bolsa, onyń 2000-ǵa jýyǵy kúrdeli jóndeýdi qajet etedi. Ol úshin jergilikti búdjetten 30 mlrd teńge bólinedi. Jalpy, az qamtylǵan, kópbalaly otbasylaryn turǵyn úımen qamtý jospar daıyndyǵyn orynbasary L.Turlashovqa tapsyrdy.
Oblys ákimi Amandyq Ǵabassuly Prezıdent Joldaýyndaǵy ár bólimdi jeke-jeke talqylady. Óńirde atqarylatyn jumystardy jaýapty sala mamandaryna tapsyrdy. Sonymen qatar, elimizdiń órkendeýine baǵyttalǵan jobany birlesip júzege asyrýǵa shaqyrdy. Al, jıynǵa kelgender memleket basshysy jarıalaǵan Joldaýǵa qoldaý bildirdi.
Baljan JUMANBEKOVA,
Almaty oblysy.
