Qarjy sarapshysy Arman Beisembaev jumys berýshilerdiń “minsiz qyzmetker” jónindegi pikirin jariia etti. Ol Atameken Business arnasyndaǵy “Dnevnoi format” baǵdarlamasynyń tikelei efirinde kásipkerler arasynda júrgizilgen saýalnama qorytyndysyn bólisti, dep habarlaidy Dalanews.kz.
Sarapshynyń aitýynsha, saýalnama barysynda kásipkerlerden “jaqsy ári yńǵaily qyzmetkerdiń” portreti qandai ekeni suralǵan. Nátijesinde jumys berýshilerdiń kózqarasy boiynsha eń “qolaily” qyzmetker shamamen 35–37 jastaǵy, ajyrasqan, eki balasy bar áiel bolyp shyqqan.
“Ózderi aitqandai, mundai adam óte eńbekqor qyzmetkerlerdiń biri sanalady. Óitkeni mundai jaǵdaida adam quqyq talap etip, jumys berýshige shart qoiýdan góri, eń aldymen otbasyn asyraýdy oilaidy. Balalaryn baǵý kerek, jalǵyz ózi kún kórýi qajet bolǵandyqtan, jumysqa barynsha jaýapkershilikpen qaraidy”, - dedi ol.
Onyń aitýynsha, eńbek zańnamasyndaǵy keibir shekteýler is júzinde ońai ainalyp ótilýi múmkin.
“Máselen, jumys berýshi qyzmetkerden "óz erkimen jumystan shyǵý" týraly ótinish jazýdy talap etetin jaǵdailar kezdesedi, al mundai áreketterdiń aldyn alý qiyn”, - dep qosty ol.
Sonymen qatar sarapshy bizneske alańdaýǵa negiz joq dep esepteitinin jetkizdi. Onyń aitýynsha, bul máselede “qorqynysh kóbine shyndyqtan asyra baǵalanady”.
