Onyń aitýynsha, koronavirýspen kúres úshin qurylǵan úkimetaralyq komissiia sheshim qabyldap, 20 qazannan bastap virýs juqtyrǵan dárigerlerden ótemaqyǵa ótinish qabyldaý toqtatty.
Qazaqstan biligi naýryzda elde indet tarai bastaǵanda koronavirýs juqtyrǵan dárigerlerge biýdjetten eki ótemaqy teńge, indetten qaitys bolǵan dárigerlerge 10 million teńge tóleý týraly sheshim qabyldaǵan.
Shoranov jumys barysynda Covid indetine shaldyǵyp, qaitys bolǵan dárigerlerdiń jaqyndaryna beriletin 10 million teńge ótemaqy saqtalatynyn jetkizdi. Resmi málimet boiynsha, elde naýryzdan beri 182 dáriger indetten kóz jumǵan. Ministrlik marqum bolǵan barlyq dárigerdiń jaqyndaryna ótemaqy tólengenin aitady.
Ministrlik ókiliniń sózinshe, endi dáriger jumys barysynda virýs juqtyrsa, oǵan qoldaýdy meditsinalyq mekeme, kásipodaq ne jergilikti bilik kórsetýi tiis.
«Bul meditsinalyq mekeme jetekshilerine medqyzmetkerlerdiń qaýipsizdigin qamtamasyz etýge, sanepidrejimdi baqylaýǵa yntalandyrady» dedi ol.
Shoranov jergilikti bilik ia meditsinalyq mekeme virýs juqtyrǵan dárigerge qoldaýdy qalai kórsetetinin ashyp aitpady.
Bilik indetpen kúresip jatqan dárigerlerdiń jalaqysyna qosymsha tólem tóleý saqtalatynyn málimdedi. Infektsiialyq aýrýhanada isteitin medqyzmetkerdiń ailyǵyna 850 myń teńge, provizorlyq statsionarda jumys isteitin dáriger men feldsher jalaqysyna 425 myń teńge, karantindik statsionar, sanitarlyq dáriger men jedel járdem júrgizýshisiniń ailyǵyna 212 myń teńge qosylady.
Qazaqstanda indet bastalǵaly myńdaǵan dáriger virýs juqtyrǵan. Elde jaz ailarynda indet órshigen tusta indetten kóz jumǵan dárigerlerdiń de sany kúrt artty. Bilik virýs juqtyrǵan medqyzmetkerlerge jáne indetten qaitys bolǵan dárigerlerdiń jaqyndaryna ótemaqy tóleý úshin komissiia qurǵan.
Koronavirýs kesirinen qaitys bolǵan dárigerlerdiń jaqyndary komissiia ótinishterin uzaq qarap jatqanyn aityp shaǵymdana bastady. Keiin Qazaqstan prezidenti Qasym-Jomart Toqaev jumys barysynda indetke shaldyǵyp, kóz jumǵan dárigerlerdiń ólim sebebin teksermei birden ótemaqy tóleýdi tapsyrǵan.
Elde naýryzdan bastap 145 myńnan asa adam indetke shaldyǵyp, eki myńnan asa adam qaitys boldy.
