ونىڭ ايتۋىنشا, كوروناۆيرۋسپەن كٷرەس ٷشٸن قۇرىلعان ٷكٸمەتارالىق كوميسسييا شەشٸم قابىلداپ, 20 قازاننان باستاپ ۆيرۋس جۇقتىرعان دەرٸگەرلەردەن ٶتەماقىعا ٶتٸنٸش قابىلداۋ توقتاتتى.
قازاقستان بيلٸگٸ ناۋرىزدا ەلدە ٸندەت تاراي باستاعاندا كوروناۆيرۋس جۇقتىرعان دەرٸگەرلەرگە بيۋدجەتتەن ەكٸ ٶتەماقى تەڭگە, ٸندەتتەن قايتىس بولعان دەرٸگەرلەرگە 10 ميلليون تەڭگە تٶلەۋ تۋرالى شەشٸم قابىلداعان.
شورانوۆ جۇمىس بارىسىندا Covid ٸندەتٸنە شالدىعىپ, قايتىس بولعان دەرٸگەرلەردٸڭ جاقىندارىنا بەرٸلەتٸن 10 ميلليون تەڭگە ٶتەماقى ساقتالاتىنىن جەتكٸزدٸ. رەسمي مەلٸمەت بويىنشا, ەلدە ناۋرىزدان بەرٸ 182 دەرٸگەر ٸندەتتەن كٶز جۇمعان. مينيسترلٸك مارقۇم بولعان بارلىق دەرٸگەردٸڭ جاقىندارىنا ٶتەماقى تٶلەنگەنٸن ايتادى.
مينيسترلٸك ٶكٸلٸنٸڭ سٶزٸنشە, ەندٸ دەرٸگەر جۇمىس بارىسىندا ۆيرۋس جۇقتىرسا, وعان قولداۋدى مەديتسينالىق مەكەمە, كەسٸپوداق نە جەرگٸلٸكتٸ بيلٸك كٶرسەتۋٸ تيٸس.
«بۇل مەديتسينالىق مەكەمە جەتەكشٸلەرٸنە مەدقىزمەتكەرلەردٸڭ قاۋٸپسٸزدٸگٸن قامتاماسىز ەتۋگە, سانەپيدرەجيمدٸ باقىلاۋعا ىنتالاندىرادى» دەدٸ ول.
شورانوۆ جەرگٸلٸكتٸ بيلٸك يا مەديتسينالىق مەكەمە ۆيرۋس جۇقتىرعان دەرٸگەرگە قولداۋدى قالاي كٶرسەتەتٸنٸن اشىپ ايتپادى.
بيلٸك ٸندەتپەن كٷرەسٸپ جاتقان دەرٸگەرلەردٸڭ جالاقىسىنا قوسىمشا تٶلەم تٶلەۋ ساقتالاتىنىن مەلٸمدەدٸ. ينفەكتسييالىق اۋرۋحانادا ٸستەيتٸن مەدقىزمەتكەردٸڭ ايلىعىنا 850 مىڭ تەڭگە, پروۆيزورلىق ستاتسيوناردا جۇمىس ٸستەيتٸن دەرٸگەر مەن فەلدشەر جالاقىسىنا 425 مىڭ تەڭگە, كارانتيندٸك ستاتسيونار, سانيتارلىق دەرٸگەر مەن جەدەل جەردەم جٷرگٸزۋشٸسٸنٸڭ ايلىعىنا 212 مىڭ تەڭگە قوسىلادى.
قازاقستاندا ٸندەت باستالعالى مىڭداعان دەرٸگەر ۆيرۋس جۇقتىرعان. ەلدە جاز ايلارىندا ٸندەت ٶرشٸگەن تۇستا ٸندەتتەن كٶز جۇمعان دەرٸگەرلەردٸڭ دە سانى كٷرت ارتتى. بيلٸك ۆيرۋس جۇقتىرعان مەدقىزمەتكەرلەرگە جەنە ٸندەتتەن قايتىس بولعان دەرٸگەرلەردٸڭ جاقىندارىنا ٶتەماقى تٶلەۋ ٷشٸن كوميسسييا قۇرعان.
كوروناۆيرۋس كەسٸرٸنەن قايتىس بولعان دەرٸگەرلەردٸڭ جاقىندارى كوميسسييا ٶتٸنٸشتەرٸن ۇزاق قاراپ جاتقانىن ايتىپ شاعىمدانا باستادى. كەيٸن قازاقستان پرەزيدەنتٸ قاسىم-جومارت توقاەۆ جۇمىس بارىسىندا ٸندەتكە شالدىعىپ, كٶز جۇمعان دەرٸگەرلەردٸڭ ٶلٸم سەبەبٸن تەكسەرمەي بٸردەن ٶتەماقى تٶلەۋدٸ تاپسىرعان.
ەلدە ناۋرىزدان باستاپ 145 مىڭنان اسا ادام ٸندەتكە شالدىعىپ, ەكٸ مىڭنان اسا ادام قايتىس بولدى.
