Keshe ulttyq ekonomika ministri Serik Jumanǵarin "Astana halyqaralyq qarjy ortalyǵyn ofshorǵa ainalyp barady" dep baibalam salyp, salyqtan jaltarǵysy keletin kompaniialar osynda tirkeletinin aitqan edi. Tipti mysal keltirip, osylai tirkelgen bir kompaniianyń kesirinen biýdjet 200 mlrd teńgeden asa KTS jáne QQS-tan aiyrylǵanyn jetkizdi. Al jýrnalister ol kompaniianyń atyn aitýdy suraǵanda vitse-premer teris ainalǵan. Qarjy salasynyń mamany Aibar Oljaev jelide Jumanǵarin aita almaǵan syrdyń shetin tarqatyp, bes jylǵa sozylǵan salyqtan jaltarý isin baiandady, dep habarlaidy Dalanews.kz.
"Aidyn Rahymbaev – búkil Qazaqstannyń salyq júiesiniń qaita qaralyp, ózgerýine sebepshi bolǵan kásipker. Baiaǵyda Úsenov degen major bes adamdy qaǵyp óltirip, otbasylarymen kelisip, bostandyqqa shyǵyp ketken. Sodan keiin bizdegi Qylmystyq kodekske apattan adam ólse, týystary keshirse de kináli jazadan qutyla almaidy túzetý engizgen bolatyn. Ol "Úsenov túzetýi" degen ataýmen tarihta qaldy. BI Group biznesti IP-larǵa bólip, salyqtan jaltara bergennen keiin Qazaqstan Úkimeti jańa Salyq kodeksin jasap, qosymsha qun salyǵyn engizip, onyń shegin 40 million teńgege deiin qysqartty. Sodan keiin BI Group satyp júrgen qymbat elitalyq úilerge de sán saltanat salyǵy engiziletin boldy. Biz Rahymbaev "droblenie" arqyly ǵana salyqtan jaltaryp júrdi, osymen onyń qýlyǵyn toqtata aldyq dep oilap júrsek, ol Úkimet pen biýdjetti on orap ketken eken", dep jazdy Aibar Oljaev Facebook-tegi paraqshasynda.
Onyń aitýynsha, vitse-premer Serik Jumanǵarin Senatta Astana halyqaralyq qarjy ortalyǵynyń salyq jeńildikterin qaita qaraýdy usynyp, bizdegi tym "aqyldy" biznesmenderdiń jappai osyǵan tirkelip, jeńildik arqyly qyrýar salyq tólemei otyrǵanyn ashyq málimdegen. Al jýrnalisterge bergen brifingide kompaniianyń atyn ataýǵa batpaǵan.
"Biraq biz sekildi sarapshylarǵa AHQO rezidentteriniń tizimi men olardyń aýdittelgen qarjylyq esebin qarai salý qiyn emes. Osy kezde Aidyn Rahymbaevtyń nege uzaq jyl boiy BI Group-tyń aýdittelgen esepterin tyǵyp kelgeni belgili boldy. "BI Group Development" 2024 jylǵy esebinde holdingtiń biraz kompaniialary AHQO erkin ekonomikalyq aimaǵyna tirkelip alǵany týraly ashyq jazylady. Shamamen tórt jyl boiy salyq jeńildikterin erkin paidalanyp kelgen", - deidi maman.
Odan ary sarapshy mynandai esep-qisapty alǵa tartady: Biai grýpptyń 2024 jyly salyqqa deiingi kirisi 91,8 milliard teńge bolǵan. 20% KPN stavkasymen holding biýdjetke 18,3 milliard teńge tóleýi tiis edi. AHQO arqyly olar salyqty 15,9 milliard teńgege túsirgen. KPN-nan 2,4 milliard teńge únemdei alǵan. Al NDS she? Bir qyzyǵy, BI Group eshqashan NDS tólegen emes.
"Jańa salyq Kodeksinde qurylys kompaniialary NDS tóleitin bolady. Ony tólemes úshin BI Group barynsha AHQO jeńildikterine jabyspaq. Eger qurylys salasyndaǵy eń iri alpaýyt NDS tólegisi kelmese, onda bizdiń salyq reformasyn osy jerden toqtata salý kerek. Nemese BI Group syndy parazit kompaniialardy AHQO-dan qýyp shyǵyp, shyńǵyrtyp turyp salyq tóletý kerek. Shaǵyn kásipker salyqtyń ár tiynyn tólep, 100 teńge penia úshin dirildep otyrǵanda, bir jylda 91 milliard teńge EBITDA alyp otyrǵan Aidyn Rahymbaev nege biýdjet aldyndaǵy azamattyq boryshynan jaltarýy tiis degen zańdy suraq týyndaidy. Serik Maqashulynyń kópshilik aldynda qatty aita almaǵan móltek syry osy edi. Bul joly qazaq biýdjeti Rahymbaevtyń qýlyǵyn túpkilikti toqtatý boiynsha sheshim qabyldaǵany anyq", dep sózin túiindedi Oljaev.
