كەشە ۇلتتىق ەكونوميكا ءمينيسترى سەرىك جۇمانعارين "استانا حالىقارالىق قارجى ورتالىعىن وفشورعا اينالىپ بارادى" دەپ بايبالام سالىپ، سالىقتان جالتارعىسى كەلەتىن كومپانيالار وسىندا تىركەلەتىنىن ايتقان ەدى. ءتىپتى مىسال كەلتىرىپ، وسىلاي تىركەلگەن ءبىر كومپانيانىڭ كەسىرىنەن بيۋدجەت 200 ملرد تەڭگەدەن اسا كتس جانە ققس-تان ايىرىلعانىن جەتكىزدى. ال جۋرناليستەر ول كومپانيانىڭ اتىن ايتۋدى سۇراعاندا ۆيسە-پرەمەر تەرىس اينالعان. قارجى سالاسىنىڭ مامانى ايبار ولجايەۆ جەلىدە جۇمانعارين ايتا الماعان سىردىڭ شەتىن تارقاتىپ، بەس جىلعا سوزىلعان سالىقتان جالتارۋ ءىسىن باياندادى، دەپ حابارلايدى Dalanews.kz.
"ايدىن راحىمبايەۆ – بۇكىل قازاقستاننىڭ سالىق جۇيەسىنىڭ قايتا قارالىپ، وزگەرۋىنە سەبەپشى بولعان كاسىپكەر. باياعىدا ۇسەنوۆ دەگەن ماجور بەس ادامدى قاعىپ ءولتىرىپ، وتباسىلارىمەن كەلىسىپ، بوستاندىققا شىعىپ كەتكەن. سودان كەيىن بىزدەگى قىلمىستىق كودەكسكە اپاتتان ادام ولسە، تۋىستارى كەشىرسە دە كىنالى جازادان قۇتىلا المايدى تۇزەتۋ ەنگىزگەن بولاتىن. ول "ۇسەنوۆ تۇزەتۋى" دەگەن اتاۋمەن تاريحتا قالدى. BI Group بيزنەستى يپ-لارعا ءبولىپ، سالىقتان جالتارا بەرگەننەن كەيىن قازاقستان ۇكىمەتى جاڭا سالىق كودەكسىن جاساپ، قوسىمشا قۇن سالىعىن ەنگىزىپ، ونىڭ شەگىن 40 ميلليون تەڭگەگە دەيىن قىسقارتتى. سودان كەيىن BI Group ساتىپ جۇرگەن قىمبات ەليتالىق ۇيلەرگە دە ءسان سالتانات سالىعى ەنگىزىلەتىن بولدى. ءبىز راحىمبايەۆ "دروبلەنيە" ارقىلى عانا سالىقتان جالتارىپ ءجۇردى، وسىمەن ونىڭ قۋلىعىن توقتاتا الدىق دەپ ويلاپ جۇرسەك، ول ۇكىمەت پەن بيۋدجەتتى ون وراپ كەتكەن ەكەن"، دەپ جازدى ايبار ولجايەۆ Facebook-تەگى پاراقشاسىندا.
ونىڭ ايتۋىنشا، ۆيسە-پرەمەر سەرىك جۇمانعارين سەناتتا استانا حالىقارالىق قارجى ورتالىعىنىڭ سالىق جەڭىلدىكتەرىن قايتا قاراۋدى ۇسىنىپ، بىزدەگى تىم "اقىلدى" بيزنەسمەندەردىڭ جاپپاي وسىعان تىركەلىپ، جەڭىلدىك ارقىلى قىرۋار سالىق تولەمەي وتىرعانىن اشىق مالىمدەگەن. ال جۋرناليستەرگە بەرگەن بريفينگىدە كومپانيانىڭ اتىن اتاۋعا باتپاعان.
"ءبىراق ءبىز سەكىلدى ساراپشىلارعا احقو رەزيدەنتتەرىنىڭ ءتىزىمى مەن ولاردىڭ اۋديتتەلگەن قارجىلىق ەسەبىن قاراي سالۋ قيىن ەمەس. وسى كەزدە ايدىن راحىمبايەۆتىڭ نەگە ۇزاق جىل بويى BI Group-تىڭ اۋديتتەلگەن ەسەپتەرىن تىعىپ كەلگەنى بەلگىلى بولدى. "BI Group Development" 2024 جىلعى ەسەبىندە حولدينگتىڭ ءبىراز كومپانيالارى احقو ەركىن ەكونوميكالىق ايماعىنا تىركەلىپ العانى تۋرالى اشىق جازىلادى. شامامەن ءتورت جىل بويى سالىق جەڭىلدىكتەرىن ەركىن پايدالانىپ كەلگەن"، - دەيدى مامان.
ودان ارى ساراپشى مىنانداي ەسەپ-قيساپتى العا تارتادى: بياي گرۋپپتىڭ 2024 جىلى سالىققا دەيىنگى كىرىسى 91،8 ميلليارد تەڭگە بولعان. 20% كپن ستاۆكاسىمەن حولدينگ بيۋدجەتكە 18،3 ميلليارد تەڭگە تولەۋى ءتيىس ەدى. احقو ارقىلى ولار سالىقتى 15،9 ميلليارد تەڭگەگە تۇسىرگەن. كپن-نان 2،4 ميلليارد تەڭگە ۇنەمدەي العان. ال ندس شە؟ ءبىر قىزىعى، BI Group ەشقاشان ندس تولەگەن ەمەس.
"جاڭا سالىق كودەكسىندە قۇرىلىس كومپانيالارى ندس تولەيتىن بولادى. ونى تولەمەس ءۇشىن BI Group بارىنشا احقو جەڭىلدىكتەرىنە جابىسپاق. ەگەر قۇرىلىس سالاسىنداعى ەڭ ءىرى الپاۋىت ندس تولەگىسى كەلمەسە، وندا ءبىزدىڭ سالىق رەفورماسىن وسى جەردەن توقتاتا سالۋ كەرەك. نەمەسە BI Group سىندى پارازيت كومپانيالاردى احقو-دان قۋىپ شىعىپ، شىڭعىرتىپ تۇرىپ سالىق تولەتۋ كەرەك. شاعىن كاسىپكەر سالىقتىڭ ءار تيىنىن تولەپ، 100 تەڭگە پەنيا ءۇشىن دىرىلدەپ وتىرعاندا، ءبىر جىلدا 91 ميلليارد تەڭگە EBITDA الىپ وتىرعان ايدىن راحىمبايەۆ نەگە بيۋدجەت الدىنداعى ازاماتتىق بورىشىنان جالتارۋى ءتيىس دەگەن زاڭدى سۇراق تۋىندايدى. سەرىك ماقاش ۇلىنىڭ كوپشىلىك الدىندا قاتتى ايتا الماعان مولتەك سىرى وسى ەدى. بۇل جولى قازاق بيۋدجەتى راحىمبايەۆتىڭ قۋلىعىن تۇپكىلىكتى توقتاتۋ بويىنشا شەشىم قابىلداعانى انىق"، دەپ ءسوزىن تۇيىندەدى ولجايەۆ.
