11 sáýirde Ulttyq Bank bazalyq mólsherleme boiynsha óziniń kezekti sheshimin jariialaýy tiis. Al bul kórsetkish naýryz aiynyń basynda ǵana birden 125 bazalyq pýnktke, iaǵni 16,50%-ǵa deiin kóterilgen edi. Ulttyq Bank bul joly bazalyq mólsherlemeni ózgerissiz qaldyrady ma, álde ony tómendetýi nemese joǵarlatýy múmkin be? Buǵan qatysty óz boljamymen Halyk Finance bólisti, dep habarlaidy Dalanews.kz.
"Naýryzda qabyldanǵan mólsherlemeniń kúrt ósimi biz jáne naryqtyń basqa kásibi qatysýshylary úshin kútpegen jaǵdai boldy, óitkeni mundai jait, bizdiń oiymyzsha, aqsha-nesie saiasatynyń boljamdaryna teris áser etedi. Naýryz aiynda Ulttyq Bank infliatsiia boiynsha boljamdardy da qaita qarap, 2025-2026 jyldarǵa arnalǵan nysanaly baǵdarlar boiynsha boljamdy kórsetkishterdi ósirdi. Biz buǵan deiin 2026 jyly ósýi josparlanyp otyrǵan QQS mólsherlemesin negizsiz esepke alýda 2025 jylǵa arnalǵan bul tsifrlar asyra baǵalanýy múmkin ekenin aitqanbyz. Sondyqtan aldaǵy otyrysta Ulttyq Bank bazalyq mólsherlemeniń aǵymdaǵy deńgeiin saqtap qalýy múmkin dep sanaimyz jáne ol jyl sońyna deiin saqtalatyn siiaqty", - deidi Halyk Finance Taldaý ortalyǵynyń sarapshysy Sanjar Qaldarov.
Onyń aitýynsha, infliatsiia boiynsha aldynda jariialaǵan óz boljamdaryndaǵy 9-10% jyl sońyna deiin saqtalady.
"Alaida, bul boljam munaidyń bir barreliniń ortasha jyldyq quny 70 dollar bolsa degenge negizdelgen. Eger munai baǵasy basqa deńgeide bekitilse, biz infliatsiia boiynsha boljamymyzdy qaita qarastyratyn bolamyz. Infliatsiia boiynsha aǵymdaǵy boljamymyzdy eskere otyryp, bizdiń oiymyzsha, 2025 jyldyń aiaǵyndaǵy bazalyq mólsherlemeniń ońtaily deńgeii 15% bolyp tabylady. 2025 jylǵy naýryzda jyldyq infliatsiianyń aqpanmen salystyrǵanda odan ári ósýi baiqaldy – 9,4%-dan 10,0%-ǵa deiin, al ailyq infliatsiia 1,3%-ǵa deiin baiaýlady (aqpanda 1,5%). Infliatsiianyń barlyq negizgi komponentteri naýryz aiynyń qorytyndysy boiynsha jyldyq mánde joǵary qalyptasty", - deidi ol.
Onyń aitýynsha, naýryz aiynda valiýta naryǵynda salystyrmaly túrde turaqtylyq baiqalady, ásirese ótken jyldyń sońy men aǵymdaǵy jyldyń qańtar ailarymen salystyrǵanda.
"Qazirgi teńgeniń álsirep, 1 AQSh dollarynyń 520 teńge deńgeiin mańailaýy munai baǵasynyń tómendeýi jáne syrtqy naryqtardaǵy dúdámaldylyqqa bailanysty rezident emesterdiń Qazaqstannyń memlekettik baǵaly qaǵazdarynan ketýinen oryn alýda. Biz, ázirge munaidyń bir barreliniń ortasha jyldyq baǵasy 70 dollar deńgeiinde bolady dep sanaimyz, soǵan sáikes, jaqyn bolashaqta teńgeniń kúrt álsireýin boljamaimyz", - deidi Sanjar Qaldarov.
Buǵan deiin saitymyzda "Ulttyq Bank basshysynyń keńesshisi bazalyq mólsherlemeni tómendetý nege qaýipti ekenin túsindirdi" degen maqala jariialanǵan bolatyn. Sondai-aq osy sipattaǵy "Bazalyq mólsherlemeni synaǵan Qusaiynov taǵy da málimdeme jasady" degen materialmen de tanysa otyryńyzdar.
