11 ساۋىردە ۇلتتىق بانك بازالىق مولشەرلەمە بويىنشا ءوزىنىڭ كەزەكتى شەشىمىن جاريالاۋى ءتيىس. ال بۇل كورسەتكىش ناۋرىز ايىنىڭ باسىندا عانا بىردەن 125 بازالىق پۋنكتكە، ياعني 16،50%-عا دەيىن كوتەرىلگەن ەدى. ۇلتتىق بانك بۇل جولى بازالىق مولشەرلەمەنى وزگەرىسسىز قالدىرادى ما، الدە ونى تومەندەتۋى نەمەسە جوعارلاتۋى مۇمكىن بە؟ بۇعان قاتىستى ءوز بولجامىمەن Halyk Finance ءبولىستى، دەپ حابارلايدى Dalanews.kz.
"ناۋرىزدا قابىلدانعان مولشەرلەمەنىڭ كۇرت ءوسىمى ءبىز جانە نارىقتىڭ باسقا كاسىبي قاتىسۋشىلارى ءۇشىن كۇتپەگەن جاعداي بولدى، ويتكەنى مۇنداي جايت، ءبىزدىڭ ويىمىزشا، اقشا-نەسيە ساياساتىنىڭ بولجامدارىنا تەرىس اسەر ەتەدى. ناۋرىز ايىندا ۇلتتىق بانك ينفلياسيا بويىنشا بولجامداردى دا قايتا قاراپ، 2025-2026 جىلدارعا ارنالعان نىسانالى باعدارلار بويىنشا بولجامدى كورسەتكىشتەردى ءوسىردى. ءبىز بۇعان دەيىن 2026 جىلى ءوسۋى جوسپارلانىپ وتىرعان ققس مولشەرلەمەسىن نەگىزسىز ەسەپكە الۋدا 2025 جىلعا ارنالعان بۇل سيفرلار اسىرا باعالانۋى مۇمكىن ەكەنىن ايتقانبىز. سوندىقتان الداعى وتىرىستا ۇلتتىق بانك بازالىق مولشەرلەمەنىڭ اعىمداعى دەڭگەيىن ساقتاپ قالۋى مۇمكىن دەپ سانايمىز جانە ول جىل سوڭىنا دەيىن ساقتالاتىن سياقتى"، - دەيدى Halyk Finance تالداۋ ورتالىعىنىڭ ساراپشىسى سانجار قالداروۆ.
ونىڭ ايتۋىنشا، ينفلياسيا بويىنشا الدىندا جاريالاعان ءوز بولجامدارىنداعى 9-10% جىل سوڭىنا دەيىن ساقتالادى.
"الايدا، بۇل بولجام مۇنايدىڭ ءبىر باررەلىنىڭ ورتاشا جىلدىق قۇنى 70 دوللار بولسا دەگەنگە نەگىزدەلگەن. ەگەر مۇناي باعاسى باسقا دەڭگەيدە بەكىتىلسە، ءبىز ينفلياسيا بويىنشا بولجامىمىزدى قايتا قاراستىراتىن بولامىز. ينفلياسيا بويىنشا اعىمداعى بولجامىمىزدى ەسكەرە وتىرىپ، ءبىزدىڭ ويىمىزشا، 2025 جىلدىڭ اياعىنداعى بازالىق مولشەرلەمەنىڭ وڭتايلى دەڭگەيى 15% بولىپ تابىلادى. 2025 جىلعى ناۋرىزدا جىلدىق ينفلياسيانىڭ اقپانمەن سالىستىرعاندا ودان ءارى ءوسۋى بايقالدى – 9،4%-دان 10،0%-عا دەيىن، ال ايلىق ينفلياسيا 1،3%-عا دەيىن باياۋلادى (اقپاندا 1،5%). ينفلياسيانىڭ بارلىق نەگىزگى كومپونەنتتەرى ناۋرىز ايىنىڭ قورىتىندىسى بويىنشا جىلدىق ماندە جوعارى قالىپتاستى"، - دەيدى ول.
ونىڭ ايتۋىنشا، ناۋرىز ايىندا ۆاليۋتا نارىعىندا سالىستىرمالى تۇردە تۇراقتىلىق بايقالادى، اسىرەسە وتكەن جىلدىڭ سوڭى مەن اعىمداعى جىلدىڭ قاڭتار ايلارىمەن سالىستىرعاندا.
"قازىرگى تەڭگەنىڭ السىرەپ، 1 اقش دوللارىنىڭ 520 تەڭگە دەڭگەيىن ماڭايلاۋى مۇناي باعاسىنىڭ تومەندەۋى جانە سىرتقى نارىقتارداعى ءدۇدامالدىلىققا بايلانىستى رەزيدەنت ەمەستەردىڭ قازاقستاننىڭ مەملەكەتتىك باعالى قاعازدارىنان كەتۋىنەن ورىن الۋدا. ءبىز، ازىرگە مۇنايدىڭ ءبىر باررەلىنىڭ ورتاشا جىلدىق باعاسى 70 دوللار دەڭگەيىندە بولادى دەپ سانايمىز، سوعان سايكەس، جاقىن بولاشاقتا تەڭگەنىڭ كۇرت السىرەۋىن بولجامايمىز"، - دەيدى سانجار قالداروۆ.
بۇعان دەيىن سايتىمىزدا "ۇلتتىق بانك باسشىسىنىڭ كەڭەسشىسى بازالىق مولشەرلەمەنى تومەندەتۋ نەگە ءقاۋىپتى ەكەنىن ءتۇسىندىردى" دەگەن ماقالا جاريالانعان بولاتىن. سونداي-اق وسى سيپاتتاعى "بازالىق مولشەرلەمەنى سىناعان قۇسايىنوۆ تاعى دا مالىمدەمە جاسادى" دەگەن ماتەريالمەن دە تانىسا وتىرىڭىزدار.
