Qazaqstandyqtar byltyr kóripkelder men balgerlerge 3 mlrd teńgege jýyq aqsha jumsaǵan. Bul - aldyńǵy jylmen salystyrǵanda baqandai 75 esege kóp kórsetkish, dep habarlaidy Dalanews.kz.
Finprom sarapshylarynyń dereginshe, Qazaqstanda keiingi ýaqytta halyqtyń kóripkelder men balgerlerge degen qyzyǵýshylyǵy kúrt ósken. Resmi túrde tirkelip, zańdy jumys isteitin balgerler, nýmerologtar men astrologtar byltyr jalpy somasy 2,9 mlrd teńgeniń qyzmetin kórsetken. Máselen, bul kórsetkish 2023 jyly bar bolǵany 39,5 mln teńgeni quraǵan.
Jalpy somanyń basym bóligin, iaǵni 2,7 mlrd teńgesin bal ashatyndar men nýmerologtar tapqan. Ekstrasensterdiń tabysy salystyrmaly túrde qarapaiymdaý: olar byltyr 225,7 mln teńgeniń qyzmetin kórsetken. Dese de, bul kórsetkish te aldyńǵy jyldan aitarlyqtai joǵary.
Bir qyzyǵy, naqty tabys kólemi resmi esepten áldeqaida kóp bolýy múmkin. Óitkeni bul saladaǵy kóptegen "mamandar" resmi túrde jeke kásipker retinde tirkelmegen jáne salyq tólemeidi.
Sarapshylar nazar aýdarǵan taǵy bir qyzyq derek: osy 3 mlrd teńgege jýyq somanyń jartysyn ǵana jeke tulǵalar tólegen. Qalǵan 1,4 mlrd teńge túrli uiymdar men basqa da zańdy kózderden túsken. Burynǵy jyldarda mundai derekter tirkelmegen edi.
Qazaqstanda balgerlik qyzmet qansha turady?
Qyzmettiń baǵasy klienttiń suranysyna bailanysty ártúrli bolyp keledi. Mysaly, qarapaiym karta arqyly bal ashý shamamen 3 myń teńge turady. Al Taro kartasymen joramal jasaý quny 5 myń teńgeden bastap, 15 myń teńgege deiin jetedi.
Adamdy dýadan qorǵaý, jaman energiiadan tazartý quny ortasha eseppen 30 myń teńge, al qaryzdan qorǵaityn arnaiy "baǵdarlama" 45 myń teńge shamasynda turady.
"Taǵdyr matritsasyn" tolyq taldaý baǵasy orta eseppen 200 myń teńgege jetedi. Jubaiyn "qaitarý" qyzmeti 500 myń teńgeden kem túspeidi. Biznesti kóripkeldik jolmen "ilgeriletý" quny 400 myń teńge shamasynda. Al destrýktivti sipattaǵy túrli rásimder 1 mln teńgeden bastalady.
Jalpy alǵanda, mundai qyzmetterdiń kóbi salystyrmaly túrde ziiansyz sanalady. Alaida kez kelgen adam bul salada alaiaqtarǵa tap bolýy múmkin. Mundai "kóripkelder" klientti qajetti qyzmetpen qamtamasyz etýdiń ornyna, qarjysyn aldap alý qaýpi basym. Buǵan qosa, túrli alaiaqtyq áreketter jasap, klientti tonap ketý jaǵdailary da jii kezdesedi.
Sondyqtan sarapshylar qazaqstandyqtarǵa ekstrasens, kóripkel, balgerlerdiń qyzmetine júginer aldynda táýekelderdi eskerip, sheshimdi muqiiat oilastyrýǵa keńes beredi. Óitkeni salynǵan qarajat ózin-ózi aqtamaýy ábden múmkin.
