Қазақстандықтар былтыр көріпкелдер мен балгерлерге 3 млрд теңгеге жуық ақша жұмсаған. Бұл - алдыңғы жылмен салыстырғанда бақандай 75 есеге көп көрсеткіш, деп хабарлайды Dalanews.kz.
Finprom сарапшыларының дерегінше, Қазақстанда кейінгі уақытта халықтың көріпкелдер мен балгерлерге деген қызығушылығы күрт өскен. Ресми түрде тіркеліп, заңды жұмыс істейтін балгерлер, нумерологтар мен астрологтар былтыр жалпы сомасы 2,9 млрд теңгенің қызметін көрсеткен. Мәселен, бұл көрсеткіш 2023 жылы бар болғаны 39,5 млн теңгені құраған.
Жалпы соманың басым бөлігін, яғни 2,7 млрд теңгесін бал ашатындар мен нумерологтар тапқан. Экстрасенстердің табысы салыстырмалы түрде қарапайымдау: олар былтыр 225,7 млн теңгенің қызметін көрсеткен. Десе де, бұл көрсеткіш те алдыңғы жылдан айтарлықтай жоғары.
Бір қызығы, нақты табыс көлемі ресми есептен әлдеқайда көп болуы мүмкін. Өйткені бұл саладағы көптеген "мамандар" ресми түрде жеке кәсіпкер ретінде тіркелмеген және салық төлемейді.
Сарапшылар назар аударған тағы бір қызық дерек: осы 3 млрд теңгеге жуық соманың жартысын ғана жеке тұлғалар төлеген. Қалған 1,4 млрд теңге түрлі ұйымдар мен басқа да заңды көздерден түскен. Бұрынғы жылдарда мұндай деректер тіркелмеген еді.
Қазақстанда балгерлік қызмет қанша тұрады?
Қызметтің бағасы клиенттің сұранысына байланысты әртүрлі болып келеді. Мысалы, қарапайым карта арқылы бал ашу шамамен 3 мың теңге тұрады. Ал Таро картасымен жорамал жасау құны 5 мың теңгеден бастап, 15 мың теңгеге дейін жетеді.
Адамды дуадан қорғау, жаман энергиядан тазарту құны орташа есеппен 30 мың теңге, ал қарыздан қорғайтын арнайы "бағдарлама" 45 мың теңге шамасында тұрады.
"Тағдыр матрицасын" толық талдау бағасы орта есеппен 200 мың теңгеге жетеді. Жұбайын "қайтару" қызметі 500 мың теңгеден кем түспейді. Бизнесті көріпкелдік жолмен "ілгерілету" құны 400 мың теңге шамасында. Ал деструктивті сипаттағы түрлі рәсімдер 1 млн теңгеден басталады.
Жалпы алғанда, мұндай қызметтердің көбі салыстырмалы түрде зиянсыз саналады. Алайда кез келген адам бұл салада алаяқтарға тап болуы мүмкін. Мұндай "көріпкелдер" клиентті қажетті қызметпен қамтамасыз етудің орнына, қаржысын алдап алу қаупі басым. Бұған қоса, түрлі алаяқтық әрекеттер жасап, клиентті тонап кету жағдайлары да жиі кездеседі.
Сондықтан сарапшылар қазақстандықтарға экстрасенс, көріпкел, балгерлердің қызметіне жүгінер алдында тәуекелдерді ескеріп, шешімді мұқият ойластыруға кеңес береді. Өйткені салынған қаражат өзін-өзі ақтамауы әбден мүмкін.
