Memorandýmǵa qol qoıǵan Túrkistan oblysynyń ákimi Janseıit Túımebaev Túrkistan oblysy men Shymkent qalasy bir-birin qoldap, birge damıtynyn aıtty.
– Ózderińiz biletindeı bıyl Shymkent qalasy respýblıkalyq mańyzǵa ıe megapolıske aınaldy. Al 19 maýsymda Elbasy Jarlyǵymen Túrkistan oblysy qurylyp, Túrkistan qalasy oblys ortalyǵy bolyp bekitildi. Búgin respýblıkalyq statýsqa ıe Shymkent qalasynyń ákimi Ǵabıdolla Rahmatollaulymen birlesken yntymaqtastyq týraly kelisimge qol qoıyp otyrmyz.
Elbasy 1 qyrkúıekte ótken QR Parlamenti palatalarynyń birlesken otyrysynda Túrkistan men Shymkentti damytý máselesine erekshe toqtalyp ótti. Qyrǵyzstanda ótken Túrki memleketteri basshylarynyń keńesinde de Túrkistannyń mańyzdylyǵyna mán berdi. Shymkent – Túrkistan oblysyna eń jaqyn qala. Sondyqtan óńirdiń damýyna eń birinshi kezekte Shymkent qalasynyń qosar úlesi zor. Biz bir-birimizdi qoldaı otyryp, oblys pen qalany, sol arqyly respýblıkamyzdy damyta berýimiz kerek, – dedi Janseıit Qanseıituly.
Óz kezeginde Shymkent qalasynyń ákimi Ǵabıdolla Ábdirahymov:
– Túrkistannyń Qazaqstan úshin, jalpy Túrki álemi úshin mańyzy zor. Shymkent qalasy men Túrkistan oblysy arasynda ákimshilik shekara bar shyǵar, biraq, biz árqashan birgemiz. Eldi eshkim bóle almaıdy. Janseıit Qanseıituly, Bas jospar bekitilgen soń Túrkistan qalasyndaǵy eń birinshi ǵımaratty Shymkent qalasy ákimdigi salyp bersin. Shymkent qalasy árqashan Túrikistanmen birgemiz. Elbasy tapsyrǵandaı, Túrkistan qalasy erterek damyp, álemdik deńgeıdegi shaharlardyń qataryna qosyla bersin. Ózińizge jáne sizben birge kóship kelgen basshylarǵa, memlekettik qyzmetshilerge tabys tileımin, – dedi.
Memorandýmnyń maqsattary men mindetteri aýqymdy. Atap aıtsaq, áleýmettik-ekonomıkalyq jáne kásipkerlik salasynda, ınfraqurylymdy damytý, ǵylym men mádenıet salasynda jáne basqa da máseleler boıynsha ákimshilik-aýmaqtyq qurylymdar arasynda tyǵyz baılanys pen áriptestik ornatý kózdelip otyr. Memorandým aıasynda ónerkásip, shaǵyn jáne orta bıznes, densaýlyq saqtaý, mádenıet, qurylys, sıfrlandyrý, kásibı apparat jasaqtaý, turǵyn úı-kommýnaldyq jáne ózge de salalar boıynsha áriptestik ornatylady. Osy arqyly oblys pen qala birge órkendep, jańa belesteri baǵyndyrmaq.
Túrkistan oblysy ákiminiń baspasóz qyzmeti
