بۇگىن تۇركىستان قالاسىندا تۇركىستان وبلىسى مەن شىمكەنت قالاسى اكىمدىكتەرىنىڭ اراسىندا مەموراندۋم جاسالدى.

مەموراندۋمعا قول قويعان تۇركىستان  وبلىسىنىڭ اكىمى جانسەيىت تۇيمەبايەۆ تۇركىستان وبلىسى مەن شىمكەنت قالاسى ءبىر-بىرىن قولداپ، بىرگە داميتىنىن ايتتى.

– وزدەرىڭىز بىلەتىندەي بيىل شىمكەنت قالاسى رەسپۋبليكالىق ماڭىزعا يە مەگاپوليسكە اينالدى. ال 19 ماۋسىمدا ەلباسى جارلىعىمەن تۇركىستان وبلىسى قۇرىلىپ، تۇركىستان قالاسى وبلىس ورتالىعى بولىپ بەكىتىلدى. بۇگىن رەسپۋبليكالىق ستاتۋسقا يە شىمكەنت قالاسىنىڭ اكىمى عابيدوللا راحماتوللاۇلىمەن بىرلەسكەن ىنتىماقتاستىق تۋرالى كەلىسىمگە قول قويىپ وتىرمىز.

ەلباسى 1 قىركۇيەكتە وتكەن ق ر پارلامەنتى پالاتالارىنىڭ بىرلەسكەن وتىرىسىندا تۇركىستان مەن شىمكەنتتى دامىتۋ ماسەلەسىنە ەرەكشە توقتالىپ ءوتتى. قىرعىزستاندا وتكەن تۇركى مەملەكەتتەرى باسشىلارىنىڭ كەڭەسىندە دە تۇركىستاننىڭ ماڭىزدىلىعىنا ءمان بەردى. شىمكەنت – تۇركىستان وبلىسىنا ەڭ جاقىن قالا. سوندىقتان ءوڭىردىڭ دامۋىنا ەڭ ءبىرىنشى كەزەكتە شىمكەنت قالاسىنىڭ قوسار ۇلەسى زور. ءبىز ءبىر-بىرىمىزدى قولداي وتىرىپ، وبلىس پەن قالانى، سول ارقىلى رەسپۋبليكامىزدى دامىتا بەرۋىمىز كەرەك، – دەدى جانسەيىت قانسەيىت ۇلى.

ءوز كەزەگىندە شىمكەنت قالاسىنىڭ  اكىمى عابيدوللا ءابدىراحىموۆ:

– تۇركىستاننىڭ قازاقستان ءۇشىن، جالپى تۇركى الەمى ءۇشىن ماڭىزى زور. شىمكەنت قالاسى مەن تۇركىستان وبلىسى اراسىندا اكىمشىلىك شەكارا بار شىعار، ءبىراق، ءبىز ءارقاشان بىرگەمىز. ەلدى ەشكىم بولە المايدى. جانسەيىت قانسەيىت ۇلى، باس جوسپار بەكىتىلگەن سوڭ تۇركىستان قالاسىنداعى ەڭ ءبىرىنشى عيماراتتى شىمكەنت قالاسى اكىمدىگى سالىپ بەرسىن. شىمكەنت قالاسى ءارقاشان تۇرىكىستانمەن بىرگەمىز. ەلباسى تاپسىرعانداي، تۇركىستان قالاسى ەرتەرەك دامىپ، الەمدىك دەڭگەيدەگى شاھارلاردىڭ قاتارىنا قوسىلا بەرسىن. وزىڭىزگە جانە سىزبەن بىرگە كوشىپ كەلگەن باسشىلارعا، مەملەكەتتىك قىزمەتشىلەرگە تابىس تىلەيمىن، – دەدى.

مەموراندۋمنىڭ ماقساتتارى مەن مىندەتتەرى اۋقىمدى. اتاپ ايتساق، الەۋمەتتىك-ەكونوميكالىق جانە كاسىپكەرلىك سالاسىندا، ينفراقۇرىلىمدى دامىتۋ، عىلىم مەن مادەنيەت سالاسىندا جانە باسقا دا ماسەلەلەر بويىنشا اكىمشىلىك-اۋماقتىق قۇرىلىمدار اراسىندا تىعىز بايلانىس پەن ارىپتەستىك ورناتۋ كوزدەلىپ وتىر. مەموراندۋم اياسىندا ونەركاسىپ، شاعىن جانە ورتا بيزنەس، دەنساۋلىق ساقتاۋ، مادەنيەت، قۇرىلىس، سيفرلاندىرۋ، كاسىبي اپپارات جاساقتاۋ، تۇرعىن ۇي-كوممۋنالدىق جانە وزگە دە سالالار بويىنشا ارىپتەستىك ورناتىلادى.  وسى ارقىلى وبلىس پەن قالا بىرگە وركەندەپ، جاڭا بەلەستەرى باعىندىرماق.

 

تۇركىستان وبلىسى اكىمىنىڭ باسپا ءسوز قىزمەتى