Qala ákimi Baqytjan Saǵyntaev júrgizilgen jumystardyń kólemi men sapasyn baǵalap, aýmaqty abattandyrý jobasyn talqylaýǵa qatysqan osy aýdannyń turǵyndarymen áńgimelesti.
Bastapqyda keńistikti qaita qurý ideiasynan bas tartyp, Abai atyndaǵy QUAOB ainalasyndaǵy búkil ansambldi qalpyna keltirý týraly sheshim qabyldandy. Osy maqsatta mamandar men sáýletshiler tartylyp, muraǵat derekteri men fotosýretter zertteldi. Sondyqtan barlyq bólshekter maksimaldy dáldikpen ári tarihi senimmen qalpyna keltirildi.
Tarihi sáýlettik kelbetti saqtap, qalpyna keltirý úshin «Nedelka» sýburqaǵynyń shamdary, arkalary men «abajýrlary» qalpyna keltirildi. Sonymen qatar, kirý tobyndaǵy bir kezderi joiylǵan sýburqaqtar qalpyna keltirildi.
Saiabaqtar men skverlerdi qaita qurý arqyly turǵyndarǵa jaily orta men súiikti demalys ornyn syilaimyz. Mundai jumystar qalanyń barlyq aýdandarynda, sonyń ishinde eń shalǵai shaǵyn aýdandarda da júzege asyrylady.
QUAOB alańy, «Nedelka» sýburqaǵy, Qasteev saiabaǵy, Botanikalyq baq, Tuńǵysh Prezident saiabaǵy qalanyń ózindik tutas jasyl beldeýin quraidy. Qalanyń «jasyl» beldeýi qurylady, ol qoǵamdyq keńistiktermen úilesedi.
Almaty qalasy Jasyl ekonomika basqarmasynyń basshysy Natalia Livinskaia atap ótkendei, Abai atyndaǵy QUAOB mańyndaǵy skverler men sýburqaq toby qalpyna keltirilgennen keiin sýburqaq pen arka jańa kelbetke ie boldy.
– Bul jer jańa dem alyp, qonaqtar men sheteldik týrister úshin tartymdy aimaq bolmaq. Olar sýdyń ústinde ilýli turǵan jeti arkadan ulttyq naqyshty kóre alady. Sol mańǵa ádemi kórik berip turǵan jańarǵan "Nedelka" keshki ýaqytta erekshe. Mańaiy jaryq ári jaily oryndar keshki Almatynyń biregei atmosferasyn syilaidy, – deidi N. Livinskaia.
Skver men «Nedelka» sýburqaǵynyń ashylýyna kelgen qala turǵyndary jaz boiy jóndeýden ótken súiikti orynnyń qalai qulpyra túskenimen bólisti. Qalpyna keltirilgen saiabaq úshin alǵys bildirdi. "Bul jerde eski dáýirdiń rýhy oianady. Operaǵa barar aldynda sýburqaqtyń janynda otyrý dástúri bar. Endi nemerelerimdi osynda ákelemin. Bizdiń qalamyz ózgerýde jáne bul qýantady", - dep bólisti almatylyqtar. Bul Almatynyń týǵan kúnine tartý etilgen tamasha syilyq. Jastyq shaqtyń bir bólshegi qaitarylǵandai ispetti.
