قالا اكىمى باقىتجان ساعىنتايەۆ جۇرگىزىلگەن جۇمىستاردىڭ كولەمى مەن ساپاسىن باعالاپ، اۋماقتى اباتتاندىرۋ جوباسىن تالقىلاۋعا قاتىسقان وسى اۋداننىڭ تۇرعىندارىمەن اڭگىمەلەستى.
باستاپقىدا كەڭىستىكتى قايتا قۇرۋ يدەياسىنان باس تارتىپ، اباي اتىنداعى قۇاوب اينالاسىنداعى بۇكىل ءانسامبلدى قالپىنا كەلتىرۋ تۋرالى شەشىم قابىلداندى. وسى ماقساتتا ماماندار مەن ساۋلەتشىلەر تارتىلىپ، مۇراعات دەرەكتەرى مەن فوتوسۋرەتتەر زەرتتەلدى. سوندىقتان بارلىق بولشەكتەر ماكسيمالدى دالدىكپەن ءارى تاريحي سەنىممەن قالپىنا كەلتىرىلدى.
تاريحي ساۋلەتتىك كەلبەتتى ساقتاپ، قالپىنا كەلتىرۋ ءۇشىن «نەدەلكا» سۋبۇرقاعىنىڭ شامدارى، اركالارى مەن «اباجۋرلارى» قالپىنا كەلتىرىلدى. سونىمەن قاتار، كىرۋ توبىنداعى ءبىر كەزدەرى جويىلعان سۋبۇرقاقتار قالپىنا كەلتىرىلدى.
ساياباقتار مەن سكۆەرلەردى قايتا قۇرۋ ارقىلى تۇرعىندارعا جايلى ورتا مەن سۇيىكتى دەمالىس ورنىن سىيلايمىز. مۇنداي جۇمىستار قالانىڭ بارلىق اۋداندارىندا، سونىڭ ىشىندە ەڭ شالعاي شاعىن اۋدانداردا دا جۇزەگە اسىرىلادى.
قۇاوب الاڭى، «نەدەلكا» سۋبۇرقاعى، قاستەيەۆ ساياباعى، بوتانيكالىق ب ا ق، تۇڭعىش پرەزيدەنت ساياباعى قالانىڭ وزىندىك تۇتاس جاسىل بەلدەۋىن قۇرايدى. قالانىڭ «جاسىل» بەلدەۋى قۇرىلادى، ول قوعامدىق كەڭىستىكتەرمەن ۇيلەسەدى.
الماتى قالاسى جاسىل ەكونوميكا باسقارماسىنىڭ باسشىسى ناتاليا ليۆينسكايا اتاپ وتكەندەي، اباي اتىنداعى قۇاوب ماڭىنداعى سكۆەرلەر مەن سۋبۇرقاق توبى قالپىنا كەلتىرىلگەننەن كەيىن سۋبۇرقاق پەن اركا جاڭا كەلبەتكە يە بولدى.
– بۇل جەر جاڭا دەم الىپ، قوناقتار مەن شەتەلدىك تۋريستەر ءۇشىن تارتىمدى ايماق بولماق. ولار سۋدىڭ ۇستىندە ءىلۋلى تۇرعان جەتى اركادان ۇلتتىق ناقىشتى كورە الادى. سول ماڭعا ادەمى كورىك بەرىپ تۇرعان جاڭارعان "نەدەلكا" كەشكى ۋاقىتتا ەرەكشە. ماڭايى جارىق ءارى جايلى ورىندار كەشكى الماتىنىڭ بىرەگەي اتموسفەراسىن سىيلايدى، – دەيدى ن. ليۆينسكايا.
سكۆەر مەن «نەدەلكا» سۋبۇرقاعىنىڭ اشىلۋىنا كەلگەن قالا تۇرعىندارى جاز بويى جوندەۋدەن وتكەن سۇيىكتى ورىننىڭ قالاي قۇلپىرا تۇسكەنىمەن ءبولىستى. قالپىنا كەلتىرىلگەن ساياباق ءۇشىن العىس ءبىلدىردى. "بۇل جەردە ەسكى ءداۋىردىڭ رۋحى ويانادى. وپەراعا بارار الدىندا سۋبۇرقاقتىڭ جانىندا وتىرۋ ءداستۇرى بار. ەندى نەمەرەلەرىمدى وسىندا اكەلەمىن. ءبىزدىڭ قالامىز وزگەرۋدە جانە بۇل قۋانتادى"، - دەپ ءبولىستى الماتىلىقتار. بۇل الماتىنىڭ تۋعان كۇنىنە تارتۋ ەتىلگەن تاماشا سىيلىق. جاستىق شاقتىڭ ءبىر بولشەگى قايتارىلعانداي ىسپەتتى.
