Senat depýtaty Marat Qojaev jol qozǵalysy erejelerin (JQE) jii buzatyn júrgizýshilerge aiyppul tóleý kezinde beriletin 50% jeńildikti alyp tastaýdy usyndy, dep habarlaidy Dalanews.kz.
“Júrgizýshilerdiń jaýapkershiligin kúsheitý máselesin qarastyrýdy usynamyz, ásirese tehnikalyq quraldar arqyly tirkelgen zań buzýshylyqtarǵa qatysty. Ákimshilik quqyqbuzýshylyq týraly kodekske (ÁQBtK) ózgerister engizý kezinde on jáne odan da kóp ret JQE buzǵan júrgizýshilerdi mindetti túrde teoriialyq emtihandy qaita tapsyrýǵa jiberý normasyn qarastyrý qajet. Sondai-aq kameralar arqyly tirkelgen qaitalanǵan quqyqbuzýshylyqtar úshin jaýapkershilikti kúsheitip, tipti ýaqytsha júrgizýshi kýáliginen aiyrý máselesin kóterý kerek. Júieli túrde zań buzatyn júrgizýshilerge 50% jeńildikti mindetti túrde alyp tastaý qajet”, – dedi Qojaev.
Depýtattyń aitýynsha, aiyppul júieli zań buzýshylyqtardyń aldyn alýdyń tiimdi tásili bola almaidy. Jol qozǵalysy erejelerin buzý jaǵdailary kóbeigenimen, bul qaitalanatyn quqyqbuzýshylyqtardy azaitýǵa aitarlyqtai yqpal etip otyrǵan joq.
“Tehnikalyq quraldar avtomatty rejimde tirkegen quqyqbuzýshylyqtardyń jalpy sany 3 708 084 jaǵdaidy quraidy. Qoldanystaǵy zańnamalyq tájiribe júieli ereje buzýshylyqtardyń aldyn alýǵa múmkindik bermeidi, óitkeni tehnikalyq quraldar tirkegen zań buzýshylyqtar úshin aiyppul kólik quralynyń iesine jazylady, biraq júrgizýshiniń zań buzýshylyq tarihy eskerilmeidi. Sondai-aq jol qozǵalysy erejelerin júieli túrde buzatyn júrgizýshilerdi qaita emtihan tapsyrýǵa mindetteitin norma joq. Sonymen qatar, tehnikalyq quraldar ereje buzýshylyq faktisin ǵana tirkeidi, biraq júrgizýshiniń biliktilik deńgeiin jáne joldaǵy qaýipti áreketterge beiimdiligin baǵalai almaidy”, – dep túsindirdi senator.
Qojaev qarjylyq múmkindigi joǵary keibir júrgizýshiler aiyppuldy jaýapkershilikten jaltarýdyń ádettegi quraly retinde qabyldaitynyn atap ótti. Mysaly, Almatyda bir júrgizýshiniń bir jyl ishinde 143 ret ereje buzyp, 3 million teńgeden astam aiyppul tólegeni anyqtalǵan.
Jol qozǵalysy qaýipsizdigin qamtamasyz etý jáne zań buzýshylyqtardyń aldyn alý maqsatynda senator mundai júrgizýshilerdi mindetti túrde qaita emtihan tapsyrýǵa jiberýdi, al qajet bolǵan jaǵdaida júrgizýshi kýáliginen aiyrýdy usyndy.
