Astana qalasynyń ákimi Jeńis Qasymbek jyl sońyna deıin aıaqtalatyn qurylys keshenderi týraly jazdy, – dep habarlaıdy Dalanews.kz Astana qalasy ákiminiń baspasóz qyzmetine silteme jasap.

– Jyl sońyna deıin qurylysy uzaqqa sozylǵan taǵy 9 turǵyn úı keshenin aıaqtaýdy josparlap otyrmyz. Olardyń arasynda 13 jyldan beri baspanasynyń qurylysy aıaqtalǵanyn kútip júrgender de bar!

«Arabı 2 - Granıtnyı 2» turǵyn úı kesheniniń qurylysymen tanystym. Bul turǵyn úı kesheni 11 jyl buryn problemaly dep tanylǵan. «Elorda qurylys kompanıasy» JSHS-ǵa tapsyrar kezde turǵyn úı kesheniniń tipti jer ýchaskesi de bolmaǵan. Jer telimin bólý, barlyq qajetti rásimnen ótý boıynsha úlken jumys atqaryldy. Qazirgi ýaqytta B blogy boıynsha qurylys-montaj jumysy júrip jatyr.

Sol sıaqty «Sadovye kvartaly» turǵyn úı kesheniniń qurylysy 2011 jyly bastalǵan. EQK-ge tapsyrar aldynda qadalary men shuńqyry ǵana bolǵan. Qazirgi ýaqytta ekinshi belgi boıynsha besinshi-altynshy bloktarda páterlerdiń aqaýlaryn joıý jáne olardy abattandyrý jumysy júrgizilip jatyr. Tórtinshi belgi boıynsha jalpy paıdalaný oryndaryn árleý, eden tósenishterin quıý, álsiz jelilerdi montajdaý boıynsha jumys júrgizilip jatyr.

Sońǵy jyldary qurylysy uzaqqa sozylǵan 140-tan astam turǵyn úı kesheni aıaqtaldy. 15,5 myńǵa tarta úlesker otbasy kópten kútken páteriniń kiltin aldy.

Qurylysy uzaqqa sozylǵan nysandardyń aıaqtalýy Memleket basshysynyń tikeleı baqylaýynda, – dep elorda ákimi Jeńis Qasymbek oıyn ortaǵa saldy.