Jetisýlyqtar dombyra tartyp, rekordty jańartty
Jetisý jerinde qazaq elin kúi terbetken kún boldy. Ulttyq brendke ainalǵan dombyra kúnin qalyń jurt bar sán-saltanatymen atap ótti.
Qazaq dese dombyra, dombyra dese qazaq, al kúi dese qazaq ta, dombyra da eske túsedi. Shynymen-aq, qazaq pen kúi degen sóz – bir uǵym. Óitkeni, kúi qazaqtyń ishki jan-dúniesiniń, arman-maqsatynyń, bolmysynyń syry. Úni. Daýysy. Kúi – myńdaǵan ult, ulystardyń ishinde tek qazaqqa ǵana tán óner, qasiet. Sol qasietti dáripteý maqsatynda, dombyra kúnine orai Taldyqorǵan qalasynda «Dombyra – dala daýsy» atty kúijarysy ótti.
Atalmysh sharaǵa Qaratal, Aqsý, Kóksý, Eskeldi aýdandary men Taldyqorǵan, Tekeli, Qapshaǵai qalasynyń 70-ke jýyq ónerpazy qatysyp, bir táýlik boiy qazaq úide kúi shertip, terme oryndap, tań atyrdy. Ánshi-kúishiler bir táýlik boiy 500-den astam týyndy oryndaǵan.Egemendik jolyndaǵy halqymyzdyń rýhyn asqaqtatyp, ulttyq salt-dástúrimizdi nasihattaityn osyndai taǵylymy mol mádeni shara Jetisý tórinde ekinshi ret uiymdastyrylyp otyr. Alaida, ol mezette táýlik boiy kúi oryndaýǵa kúsh jetkiliksiz bolypty. Osy joly shara oń nátijesin berip, Jetisýlyqtardyń rekordyn Qazaqstan rekordtar kitabynyń ókilderi belgilep, arnaiy sertifikattaryn shara uiymdastyrýshylaryna tabystady.
«Túrkiiada Aiia-Sofiiada jyl boiy toqtaýsyz quran súreleri oqylady. Sonyń aiasynda búkil dúnie júzi qurandy estigende birden kóz aldylaryna Taiaý Shyǵysty elestetedi. Endigi bizdiń maqsatymyz – dombyranyń únin estigende álem halqy keń dalamyzdy, Qazaqstandy elestetýi kerek, – dedi Almaty oblysynyń Ishki saiasat basqarmasynyń basshysy Rýstam Áliuly.
Shara sońynda óner ieleri alǵys hattarmen marapattaldy.
Baljan QAIRATQYZY
