BAQ ókilderi aldynda sóz alǵan oblys ákimi:
– Arys qalasyn qalpyna keltirý boiynsha elimizdiń ár oblysy jáne respýblikalyq mańyzy bar qalalarǵa arnaiy ýchaskeler bólindi. Bizge №15 ýchaske berildi. Ol aýdanda – 29 kóshe, 9 áleýmettik, 14 kommertsiialyq nysan men 854 jekemenshik turǵyn úi ornalasqan. Sonyń ishinde 157 jekemenshik turǵyn úidi qalpyna keltirý jumysy bizdiń aimaqtyń enshisinde. Bul úshin qazir biz jergilikti qazynadan 1 mlrd. teńge bólip, naqty jumys josparyn jasap, qurylys aýqymyn anyqtaýdamyz. Bul isti júzege asyrý úshin Arys qalasynda arnaiy qurylǵan jumys toby júr. Al qurylysty salýǵa birneshe tanymal seriktestik jumyldyrylmaq. Jumys bir aidyń ishinde bitýi tiis, – dedi.
Sonymen qatar, Arys qalasynyń 150 mektep oqýshysyna bir ai boiy jer jánnaty Jetisýda tegin demalyp qaitýyna bar jaǵdai jasalatyn bolady. Balalar shildeniń 10 juldyzynan bastap Eńbekshiqazaq aýdany men Qapshaǵai qalasynda ornalasqan «Taý Janashar» jáne «Kúnshýaq» lagerlerinde tynyǵyp, qýattanatyn bolady. Bul iske biýdjetten 30 mln. teńge bólingen.
Baldyrǵandardyń demalysyn qamtamasyz etý barysynda arnaiy baǵdarlama qurastyrylyp, balalardy moraldyq-psihologiialyq qalpyna keltirý máselesi de qamtylǵan.
Aita ketý kerek, oblysta 53 gýmanitarlyq kómek qabyldaý pýnkti ashylǵan. Qaiyrymdy iske memlekettik qyzmetkerlermen qatar, kásipkerler men qoǵamdyq uiymdar jáne oblystyń qarapaiym turǵyndary da atsalysýda. Sonyń nátijesinde arystyq aǵaiyndarǵa jalpy quny 60 mln. teńgeden asatyn 10 avtokólikpen azyq-túlik, kiim-keshekter men túrli qurylys zattary jetkizilip, tabys etilgen bolatyn. Bul kómek áli de jalǵasyn taba bermek.
Baljan JUMANBEKOVA, Almaty oblysy
