جەتىسۋلىقتار ارىس قالاسىن قالپىنا كەلتىرۋ جۇمىستارىن باستاپ كەتتى. بۇل تۋرالى الماتى وبلىسىنىڭ اكىمى اماندىق عابباس ۇلى جۋرناليستەر ۇيىندە وتكەن باسپا ءسوز ءماسليحاتىندا مالىمدەدى.

ب ا ق وكىلدەرى الدىندا ءسوز العان وبلىس اكىمى:

– ارىس قالاسىن قالپىنا كەلتىرۋ بويىنشا ەلىمىزدىڭ ءار وبلىسى جانە رەسپۋبليكالىق ماڭىزى بار قالالارعا ارنايى ۋچاسكەلەر ءبولىندى. بىزگە №15 ۋچاسكە بەرىلدى. ول اۋداندا – 29 كوشە، 9 الەۋمەتتىك، 14 كوممەرسيالىق نىسان مەن 854 جەكەمەنشىك تۇرعىن ءۇي ورنالاسقان. سونىڭ ىشىندە 157 جەكەمەنشىك تۇرعىن ءۇيدى قالپىنا كەلتىرۋ جۇمىسى ءبىزدىڭ ايماقتىڭ ەنشىسىندە. بۇل ءۇشىن ءقازىر ءبىز جەرگىلىكتى قازىنادان 1 ملرد. تەڭگە ءبولىپ، ناقتى جۇمىس جوسپارىن جاساپ، قۇرىلىس اۋقىمىن انىقتاۋدامىز. بۇل ءىستى جۇزەگە اسىرۋ ءۇشىن ارىس قالاسىندا ارنايى قۇرىلعان جۇمىس توبى ءجۇر. ال قۇرىلىستى سالۋعا بىرنەشە تانىمال سەرىكتەستىك جۇمىلدىرىلماق. جۇمىس ءبىر ايدىڭ ىشىندە ءبىتۋى ءتيىس، – دەدى.

سونىمەن قاتار، ارىس قالاسىنىڭ 150 مەكتەپ وقۋشىسىنا ءبىر اي بويى جەر ءجانناتى جەتىسۋدا تەگىن دەمالىپ قايتۋىنا بار جاعداي جاسالاتىن بولادى. بالالار شىلدەنىڭ 10 جۇلدىزىنان باستاپ ەڭبەكشىقازاق اۋدانى مەن قاپشاعاي قالاسىندا ورنالاسقان «تاۋ جاناشار» جانە «كۇنشۋاق» لاگەرلەرىندە تىنىعىپ، قۋاتتاناتىن بولادى. بۇل ىسكە بيۋدجەتتەن 30 ملن. تەڭگە بولىنگەن.

بالدىرعانداردىڭ دەمالىسىن قامتاماسىز ەتۋ بارىسىندا ارنايى باعدارلاما قۇراستىرىلىپ، بالالاردى مورالدىق-پسيحولوگيالىق قالپىنا كەلتىرۋ ماسەلەسى دە قامتىلعان.

ايتا كەتۋ كەرەك، وبلىستا 53 گۋمانيتارلىق كومەك قابىلداۋ پۋنكتى اشىلعان. قايىرىمدى ىسكە مەملەكەتتىك قىزمەتكەرلەرمەن قاتار، كاسىپكەرلەر مەن قوعامدىق ۇيىمدار جانە وبلىستىڭ قاراپايىم تۇرعىندارى دا اتسالىسۋدا. سونىڭ ناتيجەسىندە ارىستىق اعايىندارعا جالپى قۇنى 60 ملن. تەڭگەدەن اساتىن 10 اۆتوكولىكپەن  ازىق-تۇلىك، كيىم-كەشەكتەر مەن  ءتۇرلى قۇرىلىس زاتتارى جەتكىزىلىپ، تابىس ەتىلگەن بولاتىن. بۇل كومەك ءالى دە جالعاسىن تابا بەرمەك.



بالجان جۇمانبەكوۆا، الماتى وبلىسى