Jetisýdyń «Qainar-AKB» zaýyty rekordtyq ónim óndirdi
Údemeli indýstriialyq innovatsiialyq baǵdarlamanyń alǵashqy kezeńinde jumys qarqynyn údetken zaýyttyń óniminiń 70 paiyzy eksporttalýda. Qazirgi tańda TMD elderinen bólek qazaqstandyq akkýmýliatorlar Qytai, Eýropa naryǵyna «Uly dala eli» brendimen shyǵa bastady. Jyl saiyn ónim kólemin eselep otyrǵan zaýyt keler jyly 3 mln dana akkýmýliator shyǵarýdy josparlaýda.
Zaýyttyń basqarý keńesiniń tóraǵasy Qýanysh Ájmaǵanbetovtyń aitýynsha, kásiporynnyń árbir jetistigi eldegi bereke birliktiń, Elbasynyń sarabdal saiasatynyń jemisi.
«Qazaqstandaǵy barlyq qorǵasyndy aýystyramyz degen jospar qoidyq. Onyń bári Prezidenttiń qoldaýymenen, Prezidenttiń bizge aitqan josparymen jumys istelip jatqan saiasat»,– deidi Ájmaǵanbetov.
Jalpy bul atalǵan kásiporynnyń shet eldegi alǵashqy qadamy emes. Halyqaralyq talapqa sai jumys jasaityn zaýyttyń taýarlary Resei, Ózbekstan, Qyrǵyzstan, Ázerbaijan, Tájikstan, Belorýssiia, Qytai syndy elderde joǵary suranysqa ie. Jáne osy eldermen turaqty bailanys ornatqan. Ústimizdegi jyly osyndai qarym-qatynasty Afrikamen ornatylyp, zaýyttyń «BARS Asia» batareialary Afrika naryǵyna Benin Respýblikasyndaǵy dúkender jelisi arqyly satylymǵa shyqqan bolatyn. Kásiporyn qazir aiyna 250 myń dana ár túrli modifikatsiiadaǵy akkýmýliatorlardy óndiredi. Onyń 70 paiyzy eksporttalýda. Jańǵyrtýdan keiin tolyq qýatyna kóshken zaýytta myńǵa jýyq adam eńbek etedi.
Ótken jyly kásiporyn Astana qalasynda ótken indýstriialandyrý kúninde «Uly dala eli» brendimen marapattaldy. Bul brend Qazaqstandaǵy eń úzdik eksporttaýshy kompaniialarǵa beriledi. Aldaǵy ýaqytta otandyq taýar óndirýshiler «Uly dala eli» ataýymen birigip, álem naryǵynda óz qoltańbasyn qaldyryp otyrady.
"QmD" aqparat
