ۇدەمەلى يندۋستريالىق يننوۆاسيالىق باعدارلامانىڭ العاشقى كەزەڭىندە جۇمىس قارقىنىن ۇدەتكەن زاۋىتتىڭ ءونىمىنىڭ 70 پايىزى ەكسپورتتالۋدا. قازىرگى تاڭدا تمد ەلدەرىنەن بولەك قازاقستاندىق اككۋمۋلياتورلار جۇڭگو، ەۋروپا نارىعىنا «ۇلى دالا ەلى» برەندىمەن شىعا باستادى. جىل سايىن ءونىم كولەمىن ەسەلەپ وتىرعان زاۋىت كەلەر جىلى 3 ملن دانا اككۋمۋلياتور شىعارۋدى جوسپارلاۋدا.
زاۋىتتىڭ باسقارۋ كەڭەسىنىڭ ءتوراعاسى قۋانىش اجماعانبەتوۆتىڭ ايتۋىنشا، كاسىپورىننىڭ ءاربىر جەتىستىگى ەلدەگى بەرەكە بىرلىكتىڭ، ەلباسىنىڭ سارابدال ساياساتىنىڭ جەمىسى.
«قازاقستانداعى بارلىق قورعاسىندى اۋىستىرامىز دەگەن جوسپار قويدىق. ونىڭ ءبارى پرەزيدەنتتىڭ قولداۋىمەنەن، پرەزيدەنتتىڭ بىزگە ايتقان جوسپارىمەن جۇمىس ىستەلىپ جاتقان ساياسات»،– دەيدى اجماعانبەتوۆ.
جالپى بۇل اتالعان كاسىپورىننىڭ شەت ەلدەگى العاشقى قادامى ەمەس. حالىقارالىق تالاپقا ساي جۇمىس جاسايتىن زاۋىتتىڭ تاۋارلارى رەسەي، وزبەكستان، قىرعىزستان، ازەربايجان، تاجىكستان، بەلورۋسسيا، جۇڭگو سىندى ەلدەردە جوعارى سۇرانىسقا يە. جانە وسى ەلدەرمەن تۇراقتى بايلانىس ورناتقان. ۇستىمىزدەگى جىلى وسىنداي قارىم-قاتىناستى افريكامەن ورناتىلىپ، زاۋىتتىڭ «BARS Asia» باتارەيالارى افريكا نارىعىنا بەنين رەسپۋبليكاسىنداعى دۇكەندەر جەلىسى ارقىلى ساتىلىمعا شىققان بولاتىن. كاسىپورىن ءقازىر ايىنا 250 مىڭ دانا ءار ءتۇرلى موديفيكاسياداعى اككۋمۋلياتورلاردى وندىرەدى. ونىڭ 70 پايىزى ەكسپورتتالۋدا. جاڭعىرتۋدان كەيىن تولىق قۋاتىنا كوشكەن زاۋىتتا مىڭعا جۋىق ادام ەڭبەك ەتەدى.
وتكەن جىلى كاسىپورىن استانا قالاسىندا وتكەن يندۋستريالاندىرۋ كۇنىندە «ۇلى دالا ەلى» برەندىمەن ماراپاتتالدى. بۇل برەند قازاقستانداعى ەڭ ۇزدىك ەكسپورتتاۋشى كومپانيالارعا بەرىلەدى. الداعى ۋاقىتتا وتاندىق تاۋار وندىرۋشىلەر «ۇلى دالا ەلى» اتاۋىمەن بىرىگىپ، الەم نارىعىندا ءوز قولتاڭباسىن قالدىرىپ وتىرادى.
"قمد" اقپارات
