Jetisý oblysyna qarasty Jarkent qalasynda jantúrshigerlik oqiǵa boldy. Áiel adam ózge de balalarynyń kózinshe balasyn batareiaǵa bailap, aiaýsyz soqqyǵa jyqqan, dep habarlaidy Dalanews.kz.
Videoda áiel adam balasyn aq matamen batareiaǵa bailap, jerge jatqyzypǵ aiaýsyz uryp jatqany anyq kórinedi. Bir sátte áiel adam balasynyń basynan da tepkilep jatady.
Bul derekke qatysty oblysty politsiia departamenti pikir bildirdi. Jarkent qalasyndaǵy WhatsApp toptarynda taralǵan beinejazba faktisi boiynsha Panfilov aýdandyq politsiia qyzmetkerleri jedel túrde tekserý júrgizgen. Tekserý barysynda 28 jastaǵy áieldiń kámeletke tolmaǵan balasyna dene jaraqatyn salǵany anyqtaldy.
Atalǵan fakti boiynsha qylmystyq is qozǵaldy. Áiel qajetti tergeý áreketterin júrgizý úshin politsiia bólimine jetkizilip, ýaqytsha ustaý izoliatoryna qamaldy.
Eki bala qaýipsizdigin qamtamasyz etý maqsatynda barlyq mán-jaidy anyqtaǵanǵa deiin Otbasyn qoldaý ortalyǵyna ornalastyryldy.
Qamqorshylyq jáne qorǵanshylyq organynyń atyna ata-ana quqyǵynan aiyrý máselesin qaraý týraly tiisti usynys joldanatyn bolady.
Tergeý barysy Politsiia departamenti basshylyǵynyń jeke baqylaýynda. Tergeý nátijesi boiynsha kináli tulǵalar Qazaqstan Respýblikasynyń zańnamasyna sáikes jaýapkershilikke tartylady.
