جەتىسۋ وبلىسىنا قاراستى جاركەنت قالاسىندا جانتۇرشىگەرلىك وقيعا بولدى. ايەل ادام وزگە دە بالالارىنىڭ كوزىنشە بالاسىن باتارەياعا بايلاپ، اياۋسىز سوققىعا جىققان، دەپ حابارلايدى Dalanews.kz.
ۆيدەودا ايەل ادام بالاسىن اق ماتامەن باتارەياعا بايلاپ، جەرگە جاتقىزىپع اياۋسىز ۇرىپ جاتقانى انىق كورىنەدى. ءبىر ساتتە ايەل ادام بالاسىنىڭ باسىنان دا تەپكىلەپ جاتادى.
بۇل دەرەككە قاتىستى وبلىستى پوليسيا دەپارتامەنتى پىكىر ءبىلدىردى. جاركەنت قالاسىنداعى WhatsApp توپتارىندا تارالعان بەينەجازبا فاكتىسى بويىنشا پانفيلوۆ اۋداندىق پوليسيا قىزمەتكەرلەرى جەدەل تۇردە تەكسەرۋ جۇرگىزگەن. تەكسەرۋ بارىسىندا 28 جاستاعى ايەلدىڭ كامەلەتكە تولماعان بالاسىنا دەنە جاراقاتىن سالعانى انىقتالدى.
اتالعان فاكتى بويىنشا قىلمىستىق ءىس قوزعالدى. ايەل قاجەتتى تەرگەۋ ارەكەتتەرىن جۇرگىزۋ ءۇشىن پوليسيا بولىمىنە جەتكىزىلىپ، ۋاقىتشا ۇستاۋ يزولياتورىنا قامالدى.
ەكى بالا قاۋىپسىزدىگىن قامتاماسىز ەتۋ ماقساتىندا بارلىق ءمان-جايدى انىقتاعانعا دەيىن وتباسىن قولداۋ ورتالىعىنا ورنالاستىرىلدى.
قامقورشىلىق جانە قورعانشىلىق ورگانىنىڭ اتىنا اتا-انا قۇقىعىنان ايىرۋ ماسەلەسىن قاراۋ تۋرالى ءتيىستى ۇسىنىس جولداناتىن بولادى.
تەرگەۋ بارىسى پوليسيا دەپارتامەنتى باسشىلىعىنىڭ جەكە باقىلاۋىندا. تەرگەۋ ناتيجەسى بويىنشا كىنالى تۇلعالار قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە تارتىلادى.
