Jetisý oblysynda oblys ákimi Beibit Isabaevtyń tóraǵalyǵymen Prezident Joldaýy aiasynda týrizm salasyn damytý máseleleri boiynsha keńeitilgen keńes ótti. Keńeske jergilikti atqarýshy organdardyń, óńirdegi týristik salanyń ókilderi, ulttyq tabiǵi parkterdiń, demalys aimaqtary men bazalarynyń, týristik klýbtar men kásipkerlik nysandarynyń jetekshileri qatysty,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Beibit Isabaevtyń aitýynsha, Jetisý oblysynyń týrizmi 5 negizgi baǵytqa negizdelgen. Olar - Alakól, Balqash kólderi, «Altynemel», «Jońǵar Alataýy» ulttyq tabiǵi parkteri jáne Jońǵar Alataýy taý silemi.
- Týrizm infraqurylymyn damytý – Prezident Joldaýynda aitylǵan mańyzdy tapsyrmalardyń biri. Biyl týrizm salasyna bólinetin qarajat kólemi oblystyń damý biýdjetiniń 30% quraidy. Sonyń arqasynda nysandardyń qoljetimdiligi, eń aldymen jol, sý, jaryq máselesi sheshilýde. Alakólge deiingi jol jańǵyrtylyp, Balqash kóline deiingi jol kólik qatynasy úshin ashyldy, kelesi jyly abattandyrý jumystary aiaqtalǵannan keiin jol tolyq paidalanýǵa beriledi. Jasylkólge deiingi joldyń jóndeý jumystary aiaqtalýǵa jaqyn. Biyl óńirimizdiń taǵy bir kórikti jeri sanalatyn Burqanbulaq sarqyramasyna deiingi joldyń qurylysy bastaldy. Sonymen qatar injenerlik infraqurylymmen qamtý jumystary da júrgizilýde. Osylaisha, bizdiń tarapymyzdan týristik nysandardy qoljetimdi etý men salany damytý úshin qolaily jaǵdai jasaýǵa baǵyttalǵan tiisti jumystar júrgizilýde, - dedi oblys ákimi.
Ol sondai-aq jyl sońyna deiin óńirde oblystyq týrizm basqarmasy qurylyp, aýdan jáne qala deńgeiinde týrizm mamandarynyń sany artatynyn habarlady. Jáne de kelesi shomylý maýsymy bastalǵanǵa deiin Alakól, Balqash kólderi jaǵalaýlarynyń sanitarlyq jai-kúiine jaýapty kommýnaldyq kásiporyn qurylmaq. Osyǵan bailanysty kadr máselesi ózekti bolyp otyr.
– Bizge til biletin, týrizmdi damytýǵa zamanaýi kózqarasy bar mamandar qajet. Osy maqsatta biyl Alakól aýdanyndaǵy kolledjde týrizm mamandyǵy ashyldy. Jetisý ýniversitetinde de osy baǵytta mamandar daiarlanýda. Árine, bul – tek bastamasy ǵana. Bilikti mamandardy tartý isine jergilikti týristik biznes qaýymdastyǵy da belsendi aralasýy tiis. Bizge aýdarmashylar, gidter, menedjerler, uiymdastyrýshylar kerek. Bul – týrizmniń tabysty damýynyń mańyzdy faktorynyń biri, – degen B. Isabaev sózdi týrizm salasyna jetekshilik etetin orynbasary Áset Qanaǵatovqa berdi.
Óz sózinde A. Qanaǵatov óńirde týrizmdi damytý jáne problemalyq máselelerdi sheshý baǵytynda qabyldanyp jatqan sharalarǵa keńinen toqtaldy. Ol eń aldymen jol jáne injenerlik infraqurylymdy damytý basym baǵyttardyń biri ekenin atap ótip, Alakól men Balqash jaǵalaýlarynda júzege asyrylyp jatqan iri infraqurylymdyq jobalarǵa, sonyń ishinde retsiz qurylystyń aldyn alý sharalaryna nazar aýdardy. Alakól jaǵalaýynyń sanitarlyq jaǵdaiy men qaýipsizdikti, ásirese sýdaǵy qaýipsizdikti qamtamasyz etý máseleleri de nazardan tys qalǵan joq.
- Qabyldanǵan sharalardyń nátijesinde ótken jyly Jetisý oblysyna 2 million týrist keldi, bul 2023 jylmen salystyrǵanda 11%-ǵa artyq. Sonymen qatar sheteldik týrister sany 63,6%-ǵa ósti. Infraqurylymnyń damýy ornalastyrý oryndarynyń kóbeiýine, aqyly qyzmet kóleminiń artýyna jáne tiisinshe biýdjet túsimderiniń ósýine yqpal etti. Bul kórsetkishter týrister úshin óńirdiń tartymdylyǵy artyp kele jatqanyn jáne memlekettik qoldaý sharalarynyń tiimdiligin aiqyn kórsetip otyr, – dedi A. Qanaǵatov.
Kezdesýge qatysýshylar da óz pikirlerin bildirdi. Olardyń arasynda «Iahta» jáne «Taý Jetisý» demalys aimaqtary direktorynyń orynbasary David Virshki bar.
– Biyl týrizmge erekshe kóńil bólingenin sezindik. Balqash kóline baratyn joldyń jóndeý jumystary aiaqtalǵannan keiin kelýshiler sany aitarlyqtai artty. Sonymen qatar Tekelide biz paraplanerizm boiynsha birneshe is-shara ótkizdik, oǵan álemniń 50 elinen shamamen 400 ushqysh qatysty. Bul jumysty kelesi jyly da jalǵastyramyz. Óz tarapymyzdan biz investorlardy tartý jumysyn atqaryp jatyrmyz. Birlesken eńbegimizdiń nátijesi zor bolatynyna senemin, óitkeni bizdiń Jetisý kórkem ári san qyrly, – dedi D. Virshki.
Óńirdiń týristik qaýymdastyǵynyń basqa da ókilderi óz suraqtary men usynystaryn ortaǵa saldy. Atap aitqanda, olardy Burqanbulaq sarqyramasyna aparatyn joldy jóndeý jumystarynyń aiaqtalý merzimi, Tekeli qalasynda týrizmdi damytýǵa arnalǵan biryńǵai master-jospar qurý múmkindigi, investorlardy tartý jumystary jáne salaǵa kórsetiletin memlekettik qoldaý sharalary qyzyqtyrdy. Barlyq suraqtarǵa jan-jaqty jaýap berildi.
– Búgin sizdermen jaqsy da ashyq dialog boldy dep esepteimin. Týrizm – óńirde aýyl sharýashylyǵymen qatar turatyn basym baǵyttyń biri. Aldymyzda barlyq máselelerdi 3 jyldyń ishinde sheshý ortaq mindeti tur. Óz tarapymyzdan biz qajetti jaǵdailardy jasap kelemiz. Jetisý oblysy týrizm salasyndaǵy memlekettik qoldaýdy igerý deńgeii men tiimdiligi boiynsha respýblikada úshinshi orynda. Biznes qaýymdastyǵy da óz tarapynan investorlar tartyp, ilgeriletý men jarnamalaý jumystarymen ainalysýy kerek. Osylaisha kúsh-jigerimizdi biriktirý arqyly óńirdiń áleýmettik-ekonomikalyq damýyna yqpal etetin nátijege jete alamyz, – dep sózin túiindedi ol. Sondai-aq ol jaýapty tulǵalarǵa týristik nysandardy zańdastyrý, kásipkerlerdiń adal qyzmetin yntalandyrý, týristik infraqurylym jobalaryn sapaly ári ýaqytyly aiaqtaý, týrizm basqarmasyn qurý týraly birqatar tapsyrmalar berdi, - dep qorytyndylady Beibit Isabaev.
Osy kúni jiyn aiasynda týrizmdi damytýǵa úles qosyp júrgen uiymdardyń qyzmeti men ónimderi usynylǵan kórme uiymdastyryldy. Óńirdiń týristik múmkindikteri týraly «Visit Zhetysu» týristik aqparat ortalyǵynyń, «Qorǵas» ShYHO-nyń, «Jońǵar Alataýy» jáne «Altynemel» memlekettik ulttyq tabiǵi parkteriniń ókilderi baiandady. Týristik klýbtar, oblystyq balalar men jasóspirimder týrizm federatsiiasy jáne Tekeli qalasyndaǵy balalar - jasóspirimder týrizmi men ólketaný ortalyǵy osy salada jetken jetistikterimen bólisti. Sondai-aq qolónershiler men kásiporyndar óńirdiń brendtik ónimderin kópshilik nazaryna usyndy. Kórme qatysýshylarymen áńgimelesken oblys ákimi Beibit Isabaev olardyń bárine óńir týrizmin damytýǵa qosqan úlesteri úshin alǵysyn bildirdi.
