Astanada Qazaqstan Prezidenti Qasym-Jomart Toqaev pen Germaniia kantsleri Olaf Sholtstiń qatysýymen ótken biznes-forým qorytyndysy boiynsha birneshe mańyzdy qujatqa qol qoiyldy. Osylaisha eki el arasyndaǵy áriptestik nyǵaiyp, birqatar saladaǵy yntymaqtastyq damýǵa tiis. Jobalar ishinde Jetisýda salynatyn jańa júk jáne jolaýshylar áýejaiy qurylysy da bar dep habarlaidy Dalanews.kz.
Qandai qujattarǵa qol qoiyldy?
- Qazaqstan-german tehnikalyq retteý salasyndaǵy yntymaqtastyq jol kartasy. Bul qujat Qazaqstannyń Indýstriia jáne qurylys ministrligi men Germaniianyń Shyǵys ekonomika komiteti arasynda jasaldy.
- «Jasyl sýtegi» jobasyna qatysty zertteýler boiynsha yntymaqtastyq týraly memorandým. Bul — Qazaqstan Ǵylym jáne joǵary bilim ministrligi men Svevind Energy kompaniiasy arasyndaǵy qujat.
- Strategiialyq ózara túsinistik týraly memorandým. Bul qujat Ekologiia jáne tabiǵi resýrstar ministrligi, Tsifrlyq damý, innovatsiia jáne aeroǵarysh ónerkásibi ministrligi men Siemens kompaniiasy arasynda jasaldy.
- Strategiialyq seriktestik jasasýǵa kelisim. «Samuryq-Qazyna» AQ men Siemens Ortalyq Aziia JShS arasynda jasaldy.
- Halyqaralyq júk jáne jolaýshylar áýejaiy qurylysy jobasyna qatysty negizdemelik kelisim. Qujatqa Qazaqstan Kólik ministrligi men Skyhansa JShS qol qoidy.
- «Báiterek» Ulttyq basqarýshy holdingi» men HORSCH Maschinen GmbH arasynda yntymaqtastyq týraly kelisim.
- «Báiterek» ulttyq basqarýshy holdingi» men KfW Bankengruppe arasyndaǵy ózara túsinistik týraly memorandým.
- «Báiterek» ulttyq basqarýshy holdingi» men CLAAS Global Sales GmbH arasyndaǵy yntymaqtastyq týraly kelisim.
- Qazaqstannyń Ulttyq tehnologiialyq boljaý ortalyǵy men Germaniianyń Federaldyq geoǵylymdar men tabiǵi resýrstar institýty arasynda ózara túsinistik týraly memorandým.
- Qazaqstan Damý Banki men Deutsche Bank arasyndaǵy mandattyq hat.
- Qazaq Kalium Ltd AQ men KfW Bankengruppe, Euler Hermes Group arasyndaǵy Batys Qazaqstan oblysyndaǵy Sátimola ken ornynda kalii tuzy men bor qyshqylyn óndiretin keshen salý jobasy boiynsha yntymaqtastyq týraly memorandým.
- «Agromashholding» AQ men Amazonen-werke h. Dreyer Se & Co.Kg arasynda Qostanai oblysynda Condor tuqym sebý keshenin birlesip óndirý jobasyn iske asyratyn kelisim.
Jetisýdaǵy jańa áýejai qurylysy
Germaniia delegatsiiasy sapary barysynda Qazaqstan men Germaniianyń ortalyq jáne jergilikti memlekettik organdar men biznes qurylymdary arasynda 23 qujatqa qol qoiyldy.
Qazaqstan Respýblikasynyń Azamattyq aviatsiia komiteti Horgos — Shyǵys qaqpa arnaiy ekonomikalyq aimaǵyndaǵy júk jáne jolaýshylar áýejaiy qurylysynyń jobasy týraly da málimet berdi. Bul qujatqa QR Kólik vitse-ministri Talǵat Lastaev pen Skyhansa kompaniiasynyń basqarýshy seriktesi Iýrgen Gretsbah qol qoiǵan. Joba mynadai úsh kezeńge bólingen:
- Saǵatyna 500 adamǵa deiin qabyldai alatyn jolaýshylar terminaly;
- Jylyna 550 myń tonnaǵa deiin janarmai saqtaityn qoima;
- Jylyna 250 myń tonnaǵa deiin júk óńdeitin júk terminaly;
Áýe kemelerine tehnikalyq qyzmet kórsetetin ortalyq, sondai-aq týristik jáne saýda-oiyn-saýyq qyzmetterin damytý da josparlanǵan.
Jalpy jobaǵa tartylatyn jeke investitsiialar kólemi keminde 500 million AQSh dollary shamasynda bolady. Osy jobanyń arqasynda 300-den astam turaqty jumys oryndary ashylady desedi.
Qazirgi ýaqytta Jetisý oblysynyń ákimdigi áýejai qurylysyn salýǵa jer telimin bólgen. Al investor investitsiialyq kelisimge qol qoiǵannan keiin jobany júzege asyrýǵa kirisedi.
