Tanymal ánshi Áli Oqapov "Taboo" baǵdarlamasyna bergen suhbatynda jeke ómirindegi aýyr kezeńderdiń birin eske aldy, dep habarlaidy dalanews.kz.
Óner iesiniń aitýynsha, bir kezderi jubaiy Erkemen arasy sýyp, ekeýi múlde aralaspai ketken. Dál sol ýaqytta ol Erkeni qanshalyqty jaqsy kóretinin túsingenin aitty.
"Ǵashyq ekenimdi urysyp qalǵan kezde túsindim. Ekeýmiz múlde aralaspai kettik. Qazirdiń ózinde balam men áielim Atyraýda bolsa, olar ketkende ómirimniń boiaýy ketip qalǵandai bolady. Úi typ-tynysh, eshteńe qyzyq emes. Sol kezde de dál sondai kúi keshtim", – dedi Áli Oqapov.
Ánshiniń sózinshe, onyń kóńil kúiindegi ózgeristi anasy Roza Rymbaeva baiqap, jaǵdaiyn suraǵan. Áli anasyna Erkemen aralaspai ketkenin, ajyrasqandai kúide júrgenin ashyq aitqan. Sol kezde anasy oǵan sabyrmen keńes bergen.
"Anam: "Jaraidy, balam, óziń bilesiń. Biraq pikir retinde aitaiyn, Erke maǵan unaidy. Ol seniń teńiń siiaqty", – dedi", – dep eske aldy ánshi.
Osy sózderden keiin Áli Oqapov gúl alyp, Erkege barǵanyn aitty. Ol jubaiynan keshirim surap, ekeýi qaita tatýlasqan.
"Dalada jańbyr jaýyp turdy. Biz tatýlastyq, qushaqtastyq. Sol sátten bastap ómirim qaitadan túrli-tústi boiaýǵa endi", – dedi óner iesi.
