Aldymen jobanyń iske asyrylý kezeńderi men aldaǵy josparlary tanystyryldy. Kompanıa ókilderiniń aıtýynsha, quny 27,7 mlrd. teńgelik jobany qarjylandyrýǵa «Qazaqstannyń Damý Banki» AQ-nyń qarajaty men «QDB-Lızıng» AQ-nyń qarjylyq lızıńi tartylǵan. Al 10,4 mlrd. teńgesi – menshikti kapıtal, ıaǵnı nysanǵa salynǵan ınvestısıa.
Óz kezeginde kásiporynnyń iske qosylýyna jergilikti atqarýshy bılik qoldaý bildirip,«Bıznestiń jol kartasy – 2020» baǵdarlamasy arqyly joǵary vóltty jelilerdiń qurylysynoblystyq búdjetten 233 mln. teńgege qarjylandyrǵan.
Saltanatty jıynda kópshilikti mańyzdy nysannyń ashylýymen Úkimet basshysynyń orynbasary Jeńis Qasymbek quttyqtady:
– Almaty oblysynda elektr energıasynyń tapshylyǵy bar. Sondyqtan búgin iske asyrylyp otyrǵan iri jobanyń mańyzy zor dep esepteımin. Bul joba aınalasy bir jyldyń ishinde iske qosyldy. Jalpy elimizde «Ekspo – 2017» kórmesi balamaly energetıka jobalarynyń qarqyndy júzege asyrylýyna zor serpin berdi. Búgingi kúni respýblıkada 70-ten astam elektr óndiretin nysan bar. Sonyń 20-dan astamy Almaty oblysynda. Bul jaǵynan oblys kóshbasshy sanalady. Qazirgi kezde Qazaqstanda 800 MVt elektr qýaty jańartylǵan energıa kózderinen alynyp otyr. Aldaǵy ýaqytta osyndaı 5 nysan ashý josparlanǵan. Bizdiń kásipkerler kún elektr stansasyn iske qosýǵa bar kúsh-jigerin saldy. Úkimet tarapynan da qajetti qoldaý sharalary kórsetildi. Osyndaı jobalardyń arqasynda elimizde óndiriletin elektr energıasyndaǵy JEK úlesi 3%-ǵa, al 2030 jylǵa qaraı 10%-ǵa jetetin bolady. Osy jobaǵa atsalysqan azamattardyń bárine alǵys aıtamyn, – dedi J.Qasymbek.
Oblys ákimi Amandyq Batalov bılik pen bıznestiń ózara yntymaqtasa jumys isteýi zor nátıjeler berip otyrǵanyn, búgingi nysannyń ashylýy sonyń bir aıǵaǵy ekenin aıtty.
– Almaty oblysy ekonomıkanyń barlyq baǵytynda jaqsy damyp keledi, ındýstrıaldy aımaqtar qurylyp, jańa nysandar ashylýda. Jańadan iske qosylǵan iri kásiporyndardyń barlyǵy qoljetimdi elektr qýatyn qajet etedi. Búgingi ashylyp otyrǵan kún elektr stansasy oblysty elektr qýatymen qamtamasyz etýge úles qosatyn mańyzdy nysan bolmaq. Bul – Soltústik-Ońtústik elektr taratý jelisiniń boıynda turǵan iri nysan. Sonymen birge jobanyń júzege asyrylýy jańa jumys oryndarynyń ashylýyna, búdjetke salyq túsiminiń jáne óńirge tartylǵan ınvestısıa kóleminiń artýyna septigin tıgizedi. Onyń nátıjesi oblys ekonomıkasyna oń yqpal etip, ıgiligin halyq kóredi. Osy istegi seriktesterimizge rızashylyǵymdy bildiremin. Bılik pen bıznestiń birigip jumys isteýi óz jemisin berip otyr, – dedi A. Batalov.
«ENEVERSE KUNKUAT» kompanıasynyń quryltaıshylary Bolat Ábilov pen Oraz Jandosov kórsetilgen memlekettik qamqorlyqqa rızashylyǵyn aıtyp, qarjylaı qoldaý kórsetken, stansa qurylysyn júrgizgen kompanıalarǵa, qurylysshy-jumysshylarǵa alǵystaryn jetkizdi.
Resmı qonaqtar kún elektr stansasynyń sımvolıkalyq tetigin basyp, iske qosty.
Sol sıaqty osy sharada kompanıa ókilderi Qapshaǵaı qalasynyń áleýmettik nysandaryn damytýǵa 250 mln. teńgeniń sertıfıkatyn syıǵa tartty. Bul rette kelesi jyly Qapshaǵaı qalasynyń 50 jyldyǵy ótetinin atap ótý kerek.
Eske salsaq, kún elektr stansasynyń «Nurǵısa 100 MVt Solar Park Qapshaǵaı» degen ataýy belgili kompozıtor Nurǵısa Tilendıevtiń qurmetine qoıylǵan. Joba jyl saıyn 160 mln. kVt/saǵ elektr energıasyn óndiredi. KES atmosferaǵaSO2 shyǵaryndylaryn jylyna 150 myń tonnaǵa azaıtady.
KES-tiń aýmaǵy 400 gektardy alyp jatsa, jobanyń 1-shi kezeńi 274 gektarda ornalasqan. Stansada jalpy sany 303 myń panel ornatylady. Nysannyń 1-shi kezeginiń qýaty 100 MVt bolsa, tolyq qýatyna shyqqanda 150 MVt elektr qýatyn óndiretin bolady.
KES-ti salýǵa 11 otandyq merdiger kompanıa qatysqan. Olardyń arasynda «Amanat», «ASPMK-519», «Nazar Enerdjı», «Tengızstroı» jáne basqa da kompanıalar bar. Stansıa qurylysyn júrgizýde jergilikti turǵyndardan 500-den astam adam jumys istedi. Nysan iske qosylǵanda 35 adamdy jumyspen qamtıdy.
Almaty oblysy ákiminiń baspasóz qyzmeti
