Jetisýda «Diplommen aýylǵa» baǵdarlamasy 4328 jasqa sharapatyn tigizdi
«Diplommen aýylǵa» baǵdarlamasy iske qosylǵan 10 jyl ishinde Almaty oblysynda 4328 jas pedagog kóterme aqy alsa, baspana alýǵa 2 myńǵa jýyq biýdjettik nesie berilgen.
Bul týraly búgin Taldyqorǵan qalasynda ótken tamyz pedagogikalyq keńesinde oblys ákimi Amandyq Batalov aitty.
Keńeste jas mamandardy qoldaý, kadr máselesin sheshý problemalary sóz boldy.
Oblystyq bilim basqarmasynyń málimetine súiensek, ótken jyly óńirdegi bilim berý uiymdaryndaǵy pedagogtar qatary 1400-den astam jas mamanmen tolyqqan. Sonyń 1079-y «Diplommen aýylǵa» baǵdarlamasy aiasynda aýyldyq jerlerge jumysqa ornalasqan. Olarǵa jan-jaqty áleýmettik kómek kórsetilgen.
Solai bola tura, búgingi kúni oblys mektepterine orys synyptaryndaǵy bastaýysh synyp muǵalimi, orys tili men ádebieti, matematika, fizika, himiia, aǵylshyn tili pánderi boiynsha 111 mamanǵa qajettilik bar. Oblys ákimdiginen berilgen granttardyń 141-i pedagogikalyq mamandyqtarǵa bólinýi atalǵan máseleni sheshýge yqpal etpek.
