«ديپلوممەن اۋىلعا» باعدارلاماسى ىسكە قوسىلعان 10 جىل ىشىندە الماتى وبلىسىندا 4328 جاس پەداگوگ كوتەرمە اقى السا، باسپانا الۋعا 2 مىڭعا جۋىق بيۋدجەتتىك نەسيە بەرىلگەن.
بۇل تۋرالى بۇگىن تالدىقورعان قالاسىندا وتكەن تامىز پەداگوگيكالىق كەڭەسىندە وبلىس اكىمى اماندىق باتالوۆ ايتتى.
كەڭەستە جاس مامانداردى قولداۋ، كادر ماسەلەسىن شەشۋ پروبلەمالارى ءسوز بولدى.
وبلىستىق ءبىلىم باسقارماسىنىڭ مالىمەتىنە سۇيەنسەك، وتكەن جىلى وڭىردەگى ءبىلىم بەرۋ ۇيىمدارىنداعى پەداگوگتار قاتارى 1400-دەن استام جاس مامانمەن تولىققان. سونىڭ 1079-ى «ديپلوممەن اۋىلعا» باعدارلاماسى اياسىندا اۋىلدىق جەرلەرگە جۇمىسقا ورنالاسقان. ولارعا جان-جاقتى الەۋمەتتىك كومەك كورسەتىلگەن.
سولاي بولا تۇرا، بۇگىنگى كۇنى وبلىس مەكتەپتەرىنە ورىس سىنىپتارىنداعى باستاۋىش سىنىپ ءمۇعالىمى، ورىس ءتىلى مەن ادەبيەتى، ماتەماتيكا، فيزيكا، حيميا، اعىلشىن ءتىلى پاندەرى بويىنشا 111 مامانعا قاجەتتىلىك بار. وبلىس اكىمدىگىنەن بەرىلگەن گرانتتاردىڭ 141ء-ى پەداگوگيكالىق ماماندىقتارعا ءبولىنۋى اتالعان ماسەلەنى شەشۋگە ىقپال ەتپەك.
