Ótken jyly Jetisý oblysynda 9 eldi meken gazdandyrylsa, biyl taǵy 30 eldi mekenge gaz beriledi. Sonyń arqasynda óńirdiń 37 myńnan astam turǵyny kógildir otynǵa qol jetkize alady, – dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Jetisý oblystyq Energetika jáne TÚKSh basqarmasynyń derekterine qaraǵanda biyl óńirde gazdandyrýdyń jalpy quny 13,5 mlrd teńge bolatyn 30 jobasy iske asyrylýda, sonyń 22-i – jańa, 8-i – ótken jyldan aýysqan joba. Atalǵan jobalar aiasynda 656 shaqyrym gaz jelileri salynady.
Qaratal aýdanynyń Kókpekti, Sarybulaq, Dostyq, Ortatóbe, Tastóbe, Jańatalap, Eskeldi aýdanynyń Jańalyq, Shymyr, Jetisý, Jastar, Abai, Eshkiólmes, Ótenai, Qaratal, Terekti, Kóksý aýdanynyń Alǵabas, Talapty, Aqtekshe, Jetijal, Qyzyltoǵan, Ainabulaq, 10-jyldyq Qazaqstan, Jeńis, Aqshatoǵan, Boztoǵan, Jarlyózek, Keńaral, Kóksý, Eńbekshiqazaq aýyldaryna, sondai-aq Taldyqorǵan qalasynyń Moinaq aýylyna kópten kútken kógildir otyn keledi dep kútilýde. Osylaisha jalpy sany 37 289 adamǵa gazǵa qosylýǵa múmkindik jasalady.
«Bul jalpy quny 100 mlrd. teńgeden asatyn aýqymdy qymbat joba, onyń ishinde Prezidenttiń halyqty gazben qamtý jónindegi tapsyrmasyn oryndaý aiasynda respýblikalyq biýdjetten 20 mlrd. teńge bólindi. JSQ daiyn, memlekettik saraptama nátijeleri alyndy. Osy jyldyń II jartysynda qurylysty bastaimyz dep josparlap otyrmyz», - dedi oblys ákimi Beibit Isabaev jaqynda Sarqan aýdanynyń turǵyndarymen kezdesýi kezinde.
Aita ketsek, búgingi tańda Jetisý oblysynda 33 eldi meken gazdandyrylǵan, 321,7 myń adam nemese óńir halqynyń 46%-y gazǵa qol jetkize alady.
