وتكەن جىلى جەتىسۋ وبلىسىندا 9 ەلدى مەكەن گازداندىرىلسا، بيىل تاعى 30 ەلدى مەكەنگە گاز بەرىلەدى. سونىڭ ارقاسىندا ءوڭىردىڭ 37 مىڭنان استام تۇرعىنى كوگىلدىر وتىنعا قول جەتكىزە الادى، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جەتىسۋ وبلىستىق ەنەرگەتيكا جانە تۇكش باسقارماسىنىڭ دەرەكتەرىنە قاراعاندا بيىل وڭىردە گازداندىرۋدىڭ جالپى قۇنى 13،5 ملرد تەڭگە بولاتىن 30 جوباسى ىسكە اسىرىلۋدا، سونىڭ 22ء-ى – جاڭا، 8ء-ى – وتكەن جىلدان اۋىسقان جوبا. اتالعان جوبالار اياسىندا 656 شاقىرىم گاز جەلىلەرى سالىنادى.
قاراتال اۋدانىنىڭ كوكپەكتى، سارىبۇلاق، دوستىق، ورتاتوبە، تاستوبە، جاڭاتالاپ، ەسكەلدى اۋدانىنىڭ جاڭالىق، شىمىر، جەتىسۋ، جاستار، اباي، ەشكىولمەس، وتەناي، قاراتال، تەرەكتى، كوكسۋ اۋدانىنىڭ العاباس، تالاپتى، اقتەكشە، جەتىجال، قىزىلتوعان، اينابۇلاق، 10-جىلدىق قازاقستان، جەڭىس، اقشاتوعان، بوزتوعان، جارلىوزەك، كەڭارال، كوكسۋ، ەڭبەكشىقازاق اۋىلدارىنا، سونداي-اق تالدىقورعان قالاسىنىڭ مويناق اۋىلىنا كوپتەن كۇتكەن كوگىلدىر وتىن كەلەدى دەپ كۇتىلۋدە. وسىلايشا جالپى سانى 37 289 ادامعا گازعا قوسىلۋعا مۇمكىندىك جاسالادى.
بۇدان بولەك، II جارتىجىلدىقتا «تالدىقورعان – ءۇشارال» ماگيسترالدى گاز قۇبىرىنىڭ قۇرىلىسى باستالادى دەپ جوسپارلانىپ وتىر. ماسەلەن، ءۇش جارىم جىل ىشىندە اقسۋ، سارقان، الاكول اۋداندارىنىڭ 66 ەلدى مەكەنىنىڭ 124 مىڭ تۇرعىنى گازعا قول جەتكىزە الادى.
«بۇل جالپى قۇنى 100 ملرد. تەڭگەدەن اساتىن اۋقىمدى قىمبات جوبا، ونىڭ ىشىندە پرەزيدەنتتىڭ حالىقتى گازبەن قامتۋ جونىندەگى تاپسىرماسىن ورىنداۋ اياسىندا رەسپۋبليكالىق بيۋدجەتتەن 20 ملرد. تەڭگە ءبولىندى. جسق دايىن، مەملەكەتتىك ساراپتاما ناتيجەلەرى الىندى. وسى جىلدىڭ ءىى جارتىسىندا قۇرىلىستى باستايمىز دەپ جوسپارلاپ وتىرمىز»، - دەدى وبلىس اكىمى بەيبىت يسابايەۆ جاقىندا سارقان اۋدانىنىڭ تۇرعىندارىمەن كەزدەسۋى كەزىندە.
ايتا كەتسەك، بۇگىنگى تاڭدا جەتىسۋ وبلىسىندا 33 ەلدى مەكەن گازداندىرىلعان، 321،7 مىڭ ادام نەمەسە ءوڭىر حالقىنىڭ 46%-ى گازعا قول جەتكىزە الادى.
