Jetisýda balabaqshaǵa portal arqyly kezekke qoiý isi jandanǵan
«Tsifrlyq Qazaqstan» memlekettik baǵdarlamasyn iske asyrý sheńberinde oblysta E-ZHETYSU.KZ portaly iske qosyldy. Atalǵan portaldy ázirleý maqsatynda oblys biýdjetinen 58,1 mln teńge jumsalǵan. Portal arqyly mektepke deiingi balalar uiymdaryna kezekke qoiýdy jedeldetýge múmkindik bar. Bul máselege QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Almaty oblysy boiynsha departamentiniń basshysy Serikbai Nurǵisaev keńinen toqtaldy.
– Qazirgi tańda balabaqshaǵa balalardy ornalastyrý máselesi oń sheshimin tapqan. Oblysymyzdaǵy barlyq aýdan, qalalar men eldi mekenderde balabaqshalar jumys istep tur. Araǵa adam salyp, bilim basqarmasyna ótinish bildirip nemese balabaqsha basshylyǵymen ymyralasýdyń qajeti joq. Kez kelgen ata-ana balabaqsha kezegi týraly barlyq málimetti atalmysh portal arqyly anyqtai alady. Ol úshin zamanaýi tehnika quralynyń tilin bilip, óz kiltin saitqa júktese jetip jatyr. Almaty oblysynda 1169 mektepke deiingi balalar uiymy bolsa, qazir sonyń 90 paiyzy tolyǵymen osy e-zhetysu.kz portaly arqyly jumys istep tur. Júieni tanystyrý, nasihattaý maqsatynda 20 myńnan astam aqparattyq býklet shyǵarylyp, bilim bólimderi men ata-analarǵa taratylyp jatyr, – dedi ol. Sondai-aq tsifrlandyrýdyń igiliginiń biri sybailas jemqorlyq sipatyndaǵy áreketterge jol bermeitindigi ekenin de atap ótti.
Qazirgi tańda oblysta balalardy balabaqshamen qamtý deńgeii 98,5%. Biylǵy jyly taǵy 66 jekemenshik balabaqsha ashýdyń arqasynda oblystaǵy qamtý kórsetkishin 100%-ke jetkizý kózdelip otyr.
