Oblys ákimi Amandyq Batalov saltanatty qabyldaýǵa kelgen ardagerlerdi Uly Jeńis kúnimen quttyqtai otyryp, olarǵa myqty densaýlyq, sergek kóńil, uzaq ǵumyr tiledi:
– Qurmetti ardagerler, sizderdi Jeńistiń jarqyn merekesimen shyn júrekten quttyqtaimyn! Soǵystyń aiaqtalǵanynan 74 jyl ótti. Biraq sol surapyl jyldardaǵy bizdiń ata-apalarymyzdyń erligi áli kúnge bizdiń jadymyzda. Ókinishke qarai, ortamyzdaǵy soǵys ardagerleriniń qatary kúnnen-kúnge sirep barady. Elbasynyń qamqorlyǵynyń arqasynda ardagerler men basqa da sanattaǵy azamattarǵa sanatoriide tegin emdelý men ońaltý sharalary úshin 470 mln teńge bólinip otyr. Sol siiaqty Uly Otan soǵysy ardagerleri men múgedekterine qosalqy jáne kómekshi quraldar úshin jergilikti biýdjetten 3 mlrd teńgeden astam qarjy qarastyryldy. Jeńis kúnine orai oblystyq qazynadan árbir soǵys ardagerine bir rettik materialdyq kómek retinde 500 myń teńgeden beriledi, – dedi A.Batalov.
– Memleket basshysy saparyn qorytyndylai kele óńirdiń órkendeý jaiyna oń baǵa berdi. Onda árqaisylaryńyzdyń da úlesterińiz bar. Sizderdiń maidandaǵy jáne eńbek dalasyndaǵy erlikterińiz úshin, jastardy patriottyq rýhta tárbieleýdegi mańyzdy rólderińiz úshin aitatyn alǵysymyz zor. Biz óz tarapymyzdan sizderge árqashan da qoldaý kórsetemiz, – dep A.Batalov ardagerlerge degen quttyqtaý lebizin bildirdi.
Ardagerler atynan Sarqan aýdanynan kelgen Berlibek Ysqaqov merekelik quttyqtaý sózin arnady.
– Memleket bizge qamqorlyq jasap, únemi kóńil bólip, qurmettep keledi. Biz balalarymyzdyń beibit ómir súrgenin, osy azattyǵymyz ben táýelsizdigimizdi baǵalai bilgenin qalaimyz jáne barshańyzǵa árdaiym ashyq aspan, densaýlyq pen baqytty ǵumyr tileimin, – dedi B.Ysqaqov.
Alǵys tilekterin aty ańyzǵa ainalǵan «paravoz apa» Altynai Esbolatova jáne basqa da ardagerler bildirip, batalaryn berdi.
Munan ári saltanatty shara merekelik túski aspen jalǵasty. Oǵan oblystyń túkpir-túkpirinen 150 ardager men tyl eńbekkeri qatysty. Olardyń árqaisysyna gúl shoqtary men syilyqtar tabys etildi.
Almaty oblysy ákiminiń baspasóz qyzmeti
