Almaty oblysynda sport salasy boıynsha 13 dene shynyqtyrý-saýyqtyrý kesheni salyndy, sonyń ekeýi bıyl Balqash jáne Raıymbek aýdandarynda paıdalanýǵa berildi. Bul týraly Almaty oblysynyń ákimi Amandyq Batalov Nur-Sultan qalasynda ótken brıfıń barysynda aıtty, – dep habarlaıdy Almaty oblysy ákiminiń baspasóz qyzmeti.

Spıker Elbasynyń 100 sporttyq keshen salý týraly tapsyrmasyna oraı jáne buqaralyq sportty damytý maqsatynda qoldanysqa berilgen 13 DSHO-ǵa qosymsha taǵy tórt dene shynyqtyrý–saýyqtyrý kesheniniń qurylysy júrgizilip jatqanyn jetkizdi.

– Astana kúninde Taldyqorǵan qalasynda Ortalyq Azıada teńdesi joq jabyq júzý baseınin ashtyq. Qazir munda 1126 bala júzýmen aınalysady, qosymsha taǵy 2 myń bala qabyldanady. Baseın salý – áleýmettik nysandar qurylysyndaǵy memlekettik-jekeshelik áriptestik tetiginiń jemisi, – dedi A. Batalov.

Óz sózinde spıker qoǵamdyq qaýipsizdikti qamtamasyz etý máselelerine de toqtaldy. Onyń aıtýynsha, ishki ister organdarynyń materıaldyq-tehnıkalyq bazasyn nyǵaıtýǵa 4,7 mlrd teńge bólingen. 154 qyzmettik avtokólik satyp alynýda, qosymsha 250 beınebaqylaý kamerasy ornatyldy, turǵyn úımen biriktirilgen tórt ýchaskelik polısıa pýnkti salyndy, 16 jańa órt sóndirý beketi quryldy.