I. Jansúgirov atyndaǵy Jetisý ýniversitetiniń ujymy birneshe jyldan beri Taldyqorǵan qalasyndaǵy «Ainalaiyn» balalardy qoldaý ortalyǵyna qamqorlyq kórsetip keledi, dep habarlaidy Dalanews.kz
Mereke kúnderi ýniversitet qyzmetkerleri men stýdentteri balalar úiine arnaiy baryp, syilyqtar berip, tanymdyq oiyndar uiymdastyryp, tárbielenýshilerdiń kóńilin kóterip qaitady. Balalarǵa únemi kómek kórsetý maqsatynda stýdentter eriktiler tobyn qurdy. «Rais-ap» tobynyń músheleri ainalaiyndyqtarǵa aǵylshyn tilin tegin úiretip, úi tapsyrmalaryn oryndaýǵa kómektesedi.
Ýniversitettiń «Shyn júrekten» dep atalatyn qaiyrymdylyq sharasyna biyl 10 jyl toldy. Osyǵan orai, bilim ordasynda Gýmanitarlyq fakýltetiniń uiymdastyrýymen dástúrli merekelik kesh ótti. Oǵan «Ainalaiyn» ortalyǵynyń tárbielenýshileri men qyzmetkerleri qatysty. Igi sharada Basqarma tóraǵasy-rektor Ermek Bóribaev sóz alyp, birqatar qyzmetkerlerge Alǵys hat tabystady. Rektor óz sózinde búldirshinderdiń júregine jol taýyp, ýaqytpen sanaspai janynan tabylyp, olardy izgilik pen meiirimge tárbielep júrgen tárbieshilerdiń eńbegin joǵary baǵalady.
Sonymen qatar, dostyq qarym-qatynasty jandandyrý maqsatynda «Ainalaiyn» balalardy qoldaý ortalyǵymen Memorandýmǵa qol qoiyldy.
«Búgingi tańda «Ainalaiyn» ortalyǵynda 90-ǵa jýyq bala tárbielenip jatyr. 10 jyl ishinde Jetisý ýniversitetiniń ujymy toǵyz myńnan astam balaǵa qamqorlyq jasap, qol ushyn sozdy. 30-ǵa jýyq «Ainalaiynnyń» túlegi Jetisý ýniversitetinde joǵary bilim alyp, aldy túrli salada eńbek etip júr. Biylǵy túlekterdiń tórteýi Jetisý ýniversitetin tańdap otyr. Jyldar boiy kórsetken qamqorlyqtaryńyz úshin barlyq balalardyń jáne ujymnyń atynan sheksiz alǵys aitamyn»,-dedi «Ainalaiyn» ortalyǵynyń direktory Gúlmira Ahmetova.
Shara barysynda Naýryz aiynda týǵan balalarǵa stýdentter tátti tort pen syilyq tabystady. Qýanysh pen shattyqqa toly merekede balalar úlkenderge alǵysyn án-bimen jetkizdi.
