ءى. جانسۇگىروۆ اتىنداعى جەتىسۋ ۋنيۆەرسيتەتىنىڭ ۇجىمى بىرنەشە جىلدان بەرى تالدىقورعان قالاسىنداعى «اينالايىن» بالالاردى قولداۋ ورتالىعىنا قامقورلىق كورسەتىپ كەلەدى، دەپ حابارلايدى Dalanews.kz
مەرەكە كۇندەرى ۋنيۆەرسيتەت قىزمەتكەرلەرى مەن ستۋدەنتتەرى بالالار ۇيىنە ارنايى بارىپ، سىيلىقتار بەرىپ، تانىمدىق ويىندار ۇيىمداستىرىپ، تاربيەلەنۋشىلەردىڭ كوڭىلىن كوتەرىپ قايتادى. بالالارعا ۇنەمى كومەك كورسەتۋ ماقساتىندا ستۋدەنتتەر ەرىكتىلەر توبىن قۇردى. «رايس-اپ» توبىنىڭ مۇشەلەرى اينالايىندىقتارعا اعىلشىن ءتىلىن تەگىن ۇيرەتىپ، ءۇي تاپسىرمالارىن ورىنداۋعا كومەكتەسەدى.
ۋنيۆەرسيتەتتىڭ «شىن جۇرەكتەن» دەپ اتالاتىن قايىرىمدىلىق شاراسىنا بيىل 10 جىل تولدى. وسىعان وراي، ءبىلىم ورداسىندا گۋمانيتارلىق فاكۋلتەتىنىڭ ۇيىمداستىرۋىمەن ءداستۇرلى مەرەكەلىك كەش ءوتتى. وعان «اينالايىن» ورتالىعىنىڭ تاربيەلەنۋشىلەرى مەن قىزمەتكەرلەرى قاتىستى. يگى شارادا باسقارما توراعاسى-رەكتور ەرمەك بورىبايەۆ ءسوز الىپ، ءبىرقاتار قىزمەتكەرلەرگە العىس حات تابىستادى. رەكتور ءوز سوزىندە بۇلدىرشىندەردىڭ جۇرەگىنە جول تاۋىپ، ۋاقىتپەن ساناسپاي جانىنان تابىلىپ، ولاردى ىزگىلىك پەن مەيىرىمگە تاربيەلەپ جۇرگەن تاربيەشىلەردىڭ ەڭبەگىن جوعارى باعالادى.
سونىمەن قاتار، دوستىق قارىم-قاتىناستى جانداندىرۋ ماقساتىندا «اينالايىن» بالالاردى قولداۋ ورتالىعىمەن مەموراندۋمعا قول قويىلدى.
«بۇگىنگى تاڭدا «اينالايىن» ورتالىعىندا 90-عا جۋىق بالا تاربيەلەنىپ جاتىر. 10 جىل ىشىندە جەتىسۋ ۋنيۆەرسيتەتىنىڭ ۇجىمى توعىز مىڭنان استام بالاعا قامقورلىق جاساپ، قول ۇشىن سوزدى. 30-عا جۋىق «اينالايىننىڭ» تۇلەگى جەتىسۋ ۋنيۆەرسيتەتىندە جوعارى ءبىلىم الىپ، الدى ءتۇرلى سالادا ەڭبەك ەتىپ ءجۇر. بيىلعى تۇلەكتەردىڭ تورتەۋى جەتىسۋ ۋنيۆەرسيتەتىن تاڭداپ وتىر. جىلدار بويى كورسەتكەن قامقورلىقتارىڭىز ءۇشىن بارلىق بالالاردىڭ جانە ۇجىمنىڭ اتىنان شەكسىز العىس ايتامىن»،-دەدى «اينالايىن» ورتالىعىنىڭ ديرەكتورى گۇلميرا احمەتوۆا.
شارا بارىسىندا ناۋرىز ايىندا تۋعان بالالارعا ستۋدەنتتەر ءتاتتى تورت پەن سىيلىق تابىستادى. قۋانىش پەن شاتتىققا تولى مەرەكەدە بالالار ۇلكەندەرگە العىسىن ان-بيمەن جەتكىزدى.
