Eńbek adamyn eskerip júrmiz be?
Iá, aıǵaı-shý, yrdý-dyrdýǵa toly qazirgi zamanda eńbek adamynyń kóp jaǵdaıda tasada, elenbeı qalatyny ótirik emes.
«Eń aldymen, eńbek adamy baǵalanýy kerek. Oı-qabileti men bilek kúshin teń ustaıtyn kásip ıeleriniń biri – qurylysshylar», – deıdi Amandyq Batalov.
Osy oraıda Taldyqorǵan qalasynda Bıken Rımova atyndaǵy drama teatrynda qurylysshylardy quttyqtaǵan aýqymdy kezdesý ótti. Jıynǵa oblysy ákimi arnaıy kelip qajyrly, qaıratty qurylysshylardy tól merekesimen quttyqtady, óz isiniń úzdikterin arnaıy syılyqtarmen marapattady.
– Qurylys salasynyń jalpy adamzat tarıhyndaǵy alar orny alabóten. Bul adam balasy alǵashqy bop ıgergen kóne kásiptiń biri de biregeıi. Qurylys salasy eshqashan óziniń ózektiligin, mańyzdylyǵyn joǵaltpaıdy. Órkenıet ózgergen saıyn qurylys salasy da onyń kóshine ilesip otyrady.
Tıisinshe, qurylys salasyna degen suranys zaman alǵa jyljyǵan saıyn artqan ústine arta bermek, – dedi Amandyq Batalov.
Onyń aıtýynsha, talǵam ózgergen saıyn qurylys ındýstrıasyna júkteler jaýapkershilik te aýyrlaı túsýde. Bir kezdegi «hrýshevkalardyń» zamany kelmeske ketti, búgingi sáýletshilerge, jobalaýshylarǵa, ınjenerlerge, tas qalaýshylarǵa, sylaqshylarǵa qoıylar talap kún ótken saıyn qubylyp, ózgerip jatyr.
– Bul – bir jaǵynan, zańdy qubylys. Qurylysshylardyń kásibı biliktiligi ósse, utylmasymyz anyq. Demek, san men birge sapa da ósedi degen sóz. Úzbeı izdenip, bilmegenin úırenip, bilgenin jetildirip otyratyn qurylysshylary erteńgi kúni el ekonomıkasynyń damýyna da úles qosady.
Sonyń nátıjesin búgingi Taldyqorǵan oblysynyń kelbetine qarap baǵalaýǵa bolady. Búgingi Taldyqorǵan sáni men sáýleti kelisken kórikti de ásem qalaǵa aınaldy. Buǵan qurylysshylar qaýymynyń qosqan úlesi zor.
Sońǵy jyldary oblys aýmaǵynda eńseli ǵımarattar, shaǵyn aýdandar boı kóterdi, jınaqy da qolaıly joldar tóseldi, saıabaqtardyń kútimi de retke kelip, tóńiregimizdi jasyl jelek kómkerip jatyr. Munyń bári qurylysshylar qaýymynyń eseli eńbeginiń nátıjesi.
Sizder atqarǵan aýqymdy istiń ıgiligin búgingi kúni qarapaıym halyq kórip otyr. Osy úshin de sizderge barsha Jetisý jurtynyń atynan alǵysymdy aıtamyn, – dedi oblys ákimi.
Merekeli basqosýda budan bólek oblystaǵy qurylys salasyndaǵy oń ózgerister egjeı-tegjeıli aıtyldy. Oblys basshysy «7-20-25», «Baqytty otbasy», «Nurly jer» baǵdarlamalary oryndalýy barysyna toqtalyp, áleýmettik nysandar turǵyzý, jol jóndeý men salý, ınjenerlik ınfraqurylymdardy damytý máselelerin de sóz etti.
Turǵyn úı, jatahqana hám gazdandyrý máselesi
Naqtylap aıta ketelik. Bıylǵy jyly Almaty oblysyndaǵy qurylys jumystaryna 101 mlrd teńge qarjy bólingen. Ótken 8 aıda sonyń biraz bóligi nátıjeli ıgerilgen.
2019 jyly 784 myń sharshy metr turǵyn úı salý josparlanyp, sol josparǵa saı bıylǵy jyldyń alǵashqy jartyjyldyǵynda 364,8 sharshy metr turǵyn úı paıdalanýǵa berilgen.
Úkimetten jáne jergilikti búdjetten bólingen qarjy esebinen bıylǵy jyly 8 bilim berý mekemesi, 10 densaýlyq saqtaý nysany, 4 deneshynyqtyrý-saýyqtyrý kesheni, ishki ister organdarynyń 18 nysany el ıgiligine beriletin bolady.
Elbasynyń 5 áleýmettik bastamasynda basa aıtylǵan stýdent jastardy jataqhanamen qamtýǵa sáıkes Jetisýda 1930 oryndyq jataqhana qurylysy jaqynda bastalǵaly otyr.
Oblysty ortalyqtandyrylǵan sýmen qamtý deńgeıi bıylǵy jyldyń sońynda 91 paıyzǵa jetkiziledi.
Al gazdandyrý jumystary qazirgi tańda oblystaǵy 20 aýdannyń 15-inde júrýde. Sonyń ishinde oblys ortalyǵy Taldyqorǵan qalasyndaǵy jumys 2020 jyly aıaqtalyp, 55 myń abonent kógildir otynǵa qosylady.
Amandyq Batalov óńir kórsetkishterine toqtala kele, oblystaǵy qurylysshylar eńbegin taǵy bir márte tilge tıek etip, olardyń jańadan qurylǵan Raıymbek aýdanyn kórkeıtýdegi, Arys qalasyn qalpyna keltirýdegi belsendiligine rızashylyǵyn bildirdi.
«Barsha qurylysshylarǵa myqty densaýlyq, tolaǵaı tabys, eńbekte jetistikter tiledi», – dedi Batalov.
TÚIİN
Amandyq Ǵabbasuly qurylys salasynyń úzdik mamandaryn marapattady. Atap aıtqanda, birqatar memlekettik mekemelerdiń, jaýapkershiligi shekteýli seriktestikterdiń qyzmetkerlerine «Qurmetti qurylysshy» tósbelgisi, QR Indýstrıa jáne ınfraqurylymdyq damý mınıstriniń jáne oblys ákiminiń Qurmet gramotalary jáne alǵys hattary tabystaldy.
Munan soń Almaty oblysynyń Qurmetti azamaty Oralbek Jaqıanov, «Almaty Prodaction Construction & Invest» JSHS atqarýshy dırektory Nursultan Jumabek, «NSK Astana Qurylys» AQ prezıdenti Qaırat Sandyqpaev, «Taldyqorǵan joldary» JSHS tehnıkalyq óndiris bóliminiń jas mamany Almas Aqjalbekov áriptesterin tól merekelerimen quttyqtap, lebizderin bildirdi.
Mereke sońynda konserttik baǵdarlama usynylyp, tanymal estrada ánshileri men oblystaǵy óner ujymdary sahnada óz ónerlerin kórsetti.
