ەڭبەك ادامىن ەسكەرىپ ءجۇرمىز بە؟
ءيا، ايعاي-شۋ، ىردۋ-دىردۋعا تولى قازىرگى زاماندا ەڭبەك ادامىنىڭ كوپ جاعدايدا تاسادا، ەلەنبەي قالاتىنى وتىرىك ەمەس.
«ەڭ الدىمەن، ەڭبەك ادامى باعالانۋى كەرەك. وي-قابىلەتى مەن بىلەك كۇشىن تەڭ ۇستايتىن كاسىپ يەلەرىنىڭ ءبىرى – قۇرىلىسشىلار»، – دەيدى اماندىق باتالوۆ.
وسى ورايدا تالدىقورعان قالاسىندا بيكەن ريموۆا اتىنداعى دراما تەاترىندا قۇرىلىسشىلاردى قۇتتىقتاعان اۋقىمدى كەزدەسۋ ءوتتى. جيىنعا وبلىسى اكىمى ارنايى كەلىپ قاجىرلى، قايراتتى قۇرىلىسشىلاردى ءتول مەرەكەسىمەن قۇتتىقتادى، ءوز ءىسىنىڭ ۇزدىكتەرىن ارنايى سىيلىقتارمەن ماراپاتتادى.
– قۇرىلىس سالاسىنىڭ جالپى ادامزات تاريحىنداعى الار ورنى الابوتەن. بۇل ادام بالاسى العاشقى بوپ يگەرگەن كونە كاسىپتىڭ ءبىرى دە بىرەگەيى. قۇرىلىس سالاسى ەشقاشان ءوزىنىڭ وزەكتىلىگىن، ماڭىزدىلىعىن جوعالتپايدى. وركەنيەت وزگەرگەن سايىن قۇرىلىس سالاسى دا ونىڭ كوشىنە ىلەسىپ وتىرادى.
تيىسىنشە، قۇرىلىس سالاسىنا دەگەن سۇرانىس زامان العا جىلجىعان سايىن ارتقان ۇستىنە ارتا بەرمەك، – دەدى اماندىق باتالوۆ.
ونىڭ ايتۋىنشا، تالعام وزگەرگەن سايىن قۇرىلىس يندۋسترياسىنا جۇكتەلەر جاۋاپكەرشىلىك تە اۋىرلاي تۇسۋدە. ءبىر كەزدەگى «حرۋششيەۆكالاردىڭ» زامانى كەلمەسكە كەتتى، بۇگىنگى ساۋلەتشىلەرگە، جوبالاۋشىلارعا، ينجەنەرلەرگە، تاس قالاۋشىلارعا، سىلاقشىلارعا قويىلار تالاپ كۇن وتكەن سايىن قۇبىلىپ، وزگەرىپ جاتىر.
– بۇل – ءبىر جاعىنان، زاڭدى قۇبىلىس. قۇرىلىسشىلاردىڭ كاسىبي بىلىكتىلىگى وسسە، ۇتىلماسىمىز انىق. دەمەك، سان مەن بىرگە ساپا دا وسەدى دەگەن ءسوز. ۇزبەي ىزدەنىپ، بىلمەگەنىن ۇيرەنىپ، بىلگەنىن جەتىلدىرىپ وتىراتىن قۇرىلىسشىلارى ەرتەڭگى كۇنى ەل ەكونوميكاسىنىڭ دامۋىنا دا ۇلەس قوسادى.
سونىڭ ناتيجەسىن بۇگىنگى تالدىقورعان وبلىسىنىڭ كەلبەتىنە قاراپ باعالاۋعا بولادى. بۇگىنگى تالدىقورعان ءسانى مەن ساۋلەتى كەلىسكەن كورىكتى دە اسەم قالاعا اينالدى. بۇعان قۇرىلىسشىلار قاۋىمىنىڭ قوسقان ۇلەسى زور.
سوڭعى جىلدارى وبلىس اۋماعىندا ەڭسەلى عيماراتتار، شاعىن اۋداندار بوي كوتەردى، جيناقى دا قولايلى جولدار توسەلدى، ساياباقتاردىڭ كۇتىمى دە رەتكە كەلىپ، توڭىرەگىمىزدى جاسىل جەلەك كومكەرىپ جاتىر. مۇنىڭ ءبارى قۇرىلىسشىلار قاۋىمىنىڭ ەسەلى ەڭبەگىنىڭ ناتيجەسى.
سىزدەر اتقارعان اۋقىمدى ءىستىڭ يگىلىگىن بۇگىنگى كۇنى قاراپايىم حالىق كورىپ وتىر. وسى ءۇشىن دە سىزدەرگە بارشا جەتىسۋ جۇرتىنىڭ اتىنان العىسىمدى ايتامىن، – دەدى وبلىس اكىمى.
مەرەكەلى باسقوسۋدا بۇدان بولەك وبلىستاعى قۇرىلىس سالاسىنداعى وڭ وزگەرىستەر ەگجەي-تەگجەيلى ايتىلدى. وبلىس باسشىسى «7-20-25»، «باقىتتى وتباسى»، «نۇرلى جەر» باعدارلامالارى ورىندالۋى بارىسىنا توقتالىپ، الەۋمەتتىك نىساندار تۇرعىزۋ، جول جوندەۋ مەن سالۋ، ينجەنەرلىك ينفراقۇرىلىمداردى دامىتۋ ماسەلەلەرىن دە ءسوز ەتتى.
تۇرعىن ءۇي، جاتاحقانا ءھام گازداندىرۋ ماسەلەسى
ناقتىلاپ ايتا كەتەلىك. بيىلعى جىلى الماتى وبلىسىنداعى قۇرىلىس جۇمىستارىنا 101 ملرد تەڭگە قارجى بولىنگەن. وتكەن 8 ايدا سونىڭ ءبىراز بولىگى ناتيجەلى يگەرىلگەن.
2019 جىلى 784 مىڭ شارشى مەتر تۇرعىن ءۇي سالۋ جوسپارلانىپ، سول جوسپارعا ساي بيىلعى جىلدىڭ العاشقى جارتىجىلدىعىندا 364،8 شارشى مەتر تۇرعىن ءۇي پايدالانۋعا بەرىلگەن.
ۇكىمەتتەن جانە جەرگىلىكتى بيۋدجەتتەن بولىنگەن قارجى ەسەبىنەن بيىلعى جىلى 8 ءبىلىم بەرۋ مەكەمەسى، 10 دەنساۋلىق ساقتاۋ نىسانى، 4 دەنەشىنىقتىرۋ-ساۋىقتىرۋ كەشەنى، ىشكى ىستەر ورگاندارىنىڭ 18 نىسانى ەل يگىلىگىنە بەرىلەتىن بولادى.
ەلباسىنىڭ 5 الەۋمەتتىك باستاماسىندا باسا ايتىلعان ستۋدەنت جاستاردى جاتاقحانامەن قامتۋعا سايكەس جەتىسۋدا 1930 ورىندىق جاتاقحانا قۇرىلىسى جاقىندا باستالعالى وتىر.
وبلىستى ورتالىقتاندىرىلعان سۋمەن قامتۋ دەڭگەيى بيىلعى جىلدىڭ سوڭىندا 91 پايىزعا جەتكىزىلەدى.
ال گازداندىرۋ جۇمىستارى قازىرگى تاڭدا وبلىستاعى 20 اۋداننىڭ 15-ىندە جۇرۋدە. سونىڭ ىشىندە وبلىس ورتالىعى تالدىقورعان قالاسىنداعى جۇمىس 2020 جىلى اياقتالىپ، 55 مىڭ ابونەنت كوگىلدىر وتىنعا قوسىلادى.
اماندىق باتالوۆ ءوڭىر كورسەتكىشتەرىنە توقتالا كەلە، وبلىستاعى قۇرىلىسشىلار ەڭبەگىن تاعى ءبىر مارتە تىلگە تيەك ەتىپ، ولاردىڭ جاڭادان قۇرىلعان رايىمبەك اۋدانىن كوركەيتۋدەگى، ارىس قالاسىن قالپىنا كەلتىرۋدەگى بەلسەندىلىگىنە ريزاشىلىعىن ءبىلدىردى.
«بارشا قۇرىلىسشىلارعا مىقتى دەنساۋلىق، تولاعاي تابىس، ەڭبەكتە جەتىستىكتەر تىلەدى»، – دەدى باتالوۆ.
ءتۇيىن
اماندىق عابباس ۇلى قۇرىلىس سالاسىنىڭ ۇزدىك ماماندارىن ماراپاتتادى. اتاپ ايتقاندا، ءبىرقاتار مەملەكەتتىك مەكەمەلەردىڭ، جاۋاپكەرشىلىگى شەكتەۋلى سەرىكتەستىكتەردىڭ قىزمەتكەرلەرىنە «قۇرمەتتى قۇرىلىسشى» توسبەلگىسى، ق ر يندۋستريا جانە ينفراقۇرىلىمدىق دامۋ ءمينيسترىنىڭ جانە وبلىس اكىمىنىڭ قۇرمەت گراموتالارى جانە العىس حاتتارى تابىستالدى.
مۇنان سوڭ الماتى وبلىسىنىڭ قۇرمەتتى ازاماتى ورالبەك جاقيانوۆ، «الماتى Prodaction Construction & Invest» ج ش س اتقارۋشى ديرەكتورى نۇرسۇلتان جۇمابەك، «نسك استانا قۇرىلىس» اق پرەزيدەنتى قايرات ساندىقپايەۆ، «تالدىقورعان جولدارى» ج ش س تەحنيكالىق ءوندىرىس ءبولىمىنىڭ جاس مامانى الماس اقجالبەكوۆ ارىپتەستەرىن ءتول مەرەكەلەرىمەن قۇتتىقتاپ، لەبىزدەرىن ءبىلدىردى.
مەرەكە سوڭىندا كونسەرتتىك باعدارلاما ۇسىنىلىپ، تانىمال ەسترادا انشىلەرى مەن وبلىستاعى ونەر ۇجىمدارى ساحنادا ءوز ونەرلەرىن كورسەتتى.
