Oblys qurylǵanǵa deiin Jetisý óńirinde nebary tek 5 eldi meken gazdandyrylǵan bolsa, búginge deiin taǵy 79 eldi mekenge tabiǵi gaz jetkizildi. Qazir oblysta 84 eldi mekenge gaz tartyldy, dep habarlaidy Dalanews.kz
Jalpy, gazdandyrý – Prezidenttiń tapsyrmasyna sáikes oblys basshylyǵy erekshe mán berip otyrǵan basym baǵyttardyń biri. 2025 jyldyń sońyna deiin óńirde gazdandyrý deńgeii 71,4% bolyp, Panfilov aýdanyn qosa alǵanda, Kerbulaq aýdanynan Taldyqorǵanǵa deiingi 500 myńnan astam halqy bar 126 eldi meken gazǵa qol jetkize alady.
Turǵyndardyń aitýynsha, kógildir otynnyń kelýimen birge aýyldaǵy turmys ta jaily bola túsken.
- Bizdiń aýylǵa gaz 2023 jyldan bastap berile bastady. Kógildir otyn jetkiziledi degendi estigennen keiin otbasymyzǵa jańa úi turǵyzdyq. Endi pesh jaǵýdyń, kómir-otyn tasýdyń qajeti bolmaidy. Qazir jańa úiimizde gaz da, sý da bar. Memleket tarapynan aýyldyq jerge barlyq jaǵdai jasalyp jatqany qýantady, - dedi Kóksý aýdany Aldabergenov aýylynyń turǵyny Qudaibergen Mahmetov.
Sonymen qatar 2024 jyldyń tamyz aiynda «Taldyqorǵan-Úsharal» magistraldy gaz qubyrynyń qurylysy bastaldy. Biylǵy jyldyń kúzinde aiaqtalady dep kútilýde. Bul jobany iske asyrýdyń nátijesinde Alakól, Aqsý, Sarqan aýdandarynyń 66 eldi mekeni gazben qamtamasyz etilmek.
Sondai-aq aldaǵy ýaqytta oblysty tabiǵi gazben qosymsha qamtamasyz etý úshin «Almaty - Taldyqorǵan» lýpingisiniń (ekinshi tarmaǵy) qurylysyn salýǵa qatysty daiyndyq júrgizilýde.
Atap ótsek, gazdandyrý isi barysynda 1800-dei turaqty jáne ýaqytsha jumys oryndary ashyldy.
Gaz qostyrý qunyna toqtalsaq, oblys ákiminiń tapsyrmasyna sáikes qabyldanǵan sharalardyń arqasynda básekelestik ortany damytý arqyly gaz qostyrý qunyn qazandyq pen qajetti jiyntyqtardy qospaǵanda 170-175 myń teńgege deiin tómendetýge múmkindik týdy (gaz qubyrynyń uzyndyǵy 25 metrge deiin). Sonymen birge bir jarym jyldyń ishinde 1600 gaz qazandyǵyn satyp alýǵa 500 million teńge bólindi, turǵyndarǵa qazandyqtyń tólemin 10 aiǵa deiin bólip tóleýge jeńildikti jaǵdai jasalyp otyr.
Jalpy, 2028 jylǵa qarai Jetisý oblysynda gazdandyrýǵa jatatyn 192 eldi mekenge tolyqtai gaz tartylady. Sonyń arqasynda 624 myńnan astam turǵyn nemese óńir halqynyń 91%-y kógildir otynǵa qol jetkize alady.
