Jetisý óńirinen Uly Otan soǵysyndaǵy maidan dalasyna 120 myńnan astam adam attanyp, onyń 47 myńy urys dalalarynda máńgilikke kóz jumdy. Jetisýlyq 38 jaýynger Keńes Odaǵynyń Batyry atansa, 5-eýi Dańq ordeniniń tolyq iegeri, 58-i II, III dárejeli Dańq ordeniniń iegeri atandy. Osy jáne basqa da qundy derekter Jetisýda oblys ákimdiginiń qoldaýymen Jeńistiń 80 jyldyǵyna orai jaryq kórgen «Urpaqqa uran bolǵan Uly Jeńis» atty kitapta keńinen jazylyp kórsetilgen,- dep habarlaidy Dalanews.kz
Taldyqorǵandaǵy Saltanat saraiynda ótken kezdesý barysynda «Urpaqqa uran bolǵan Uly Jeńis» atty jańa jinaq tanystyryldy.
Atap ótsek, oblystyq memlekettik arhiv qurastyrǵan jinaq 5 bólimnen turady. Birinshi bólimde Jetisýdan shyqqan Keńes Odaǵynyń Batyrlary men «Dańq» ordeni iegerleriniń ómiri men erligi týraly málimetter berilgen. Ekinshi bólimde oblystyń aýdan-qalalarynan jinaqtalǵan 939 ardagerdiń tizimi men sýretteri basylsa, úshinshi bólim tyldaǵy ónerkásip, mekemeler men aýyl sharýashylyǵy eńbekkerleriniń jeńiske jetý jolyndaǵy eren eńbegi men aýyr ómiri jaily syr shertedi. Tórtinshi bólimge arhivte memlekettik saqtaýda turǵan jeke tektik qor qujattarynan qoljazbalar, saqtalǵan jaýyngerlik hattar, estelik jazbalar t.b. qujattar engizildi. Sonymen qatar Ortalyq memlekettik arhivte, Ortalyq memlekettik ǵylymi tehnikalyq qujattama arhivinde saqtalǵan Jetisý óńirinen attanǵan jaýyngerler týraly qundy qujattar da jinaqtan tys qalǵan joq. Besinshi bólim arhivtik fotoqujattar toptamasynan turady.
- Arhiv – qashanda qundy qujattar qazynasy. Ol jai saqtalyp qana qoimai, urpaqtyń óz tarihy men tulǵalaryn tanýyna qyzmet etýi tiis. Sondyqtan Uly Jeńistiń 80 jyldyǵy qarsańynda Otan soǵysy kezeńiniń shejiresin shertetin, jeńisti jaqyndatqan jaýjúrek batyrlar jaily jinaq daiyndaýdy jón kórdik. Arhiv materialdary 6 ai boiy jinaqtaldy. Bul jumysqa oblystyq arhiv qyzmetkerleri túgelge derlik tartyldy. Jinaqty arhiv qujattaryna, jaýyngerlerdiń hattaryna, soǵysty óz kózimen kórgen maidangerlerdiń estelikterine súiene otyryp qurastyrdyq. Bul eńbekti bolashaq urpaqtar da oqyp, paidalanady dep oilamyn, - deidi Jetisý oblysynyń memlekettik arhiviniń direktory Gúljihan Istambekova.
Atap ótsek, kitap 1 myń danamen jaryq kórdi, aldaǵy ýaqytta óńirdiń barlyq kitaphanalary men arhivterine taratylady dep josparlanyp otyr.
