Jetisý oblysynda tuńǵysh ret áleýmettik mańyzy bar joba – múgedek jandardyń úiinde kóshpeli ońaltý sharalaryn júrgizý qolǵa alyndy. Atalǵan joba «Asar» múgedekterge arnalǵan sporttyq-ońaltý ortalyǵynyń bazasynda oblystyq jumyspen qamtýdy úilestirý jáne áleýmettik baǵdarlamalar basqarmasynyń qoldaýymen uiymdastyryldy,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
«Asar» ortalyǵynyń direktory Eldos Baialyshbaevtyń aitýynsha, bul joba ortalyqqa ózdiginen kele almaityndar úshin asa paidaly.
"Biz jumys barysynda múgedektigi bar adamdardyń kópshiligine ońaltý ortalyǵyna kelýdiń qiyndyq týǵyzatynyn baiqadyq. Kúndizgi ýaqytta keibireýler jumysta bolsa, keibirine úilerinen ortalyqqa jetý ońai emes. Sondyqtan biz osy kóshpeli ońaltý jobasyn qolǵa aldyq. Bizdiń bul mańyzdy bastamamyzǵa oblys basshylyǵy qoldaý bildirdi", - dedi Eldos Baialyshbaev.
Jalpy baǵdarlamada patsientterdiń eki toby qamtylýda. Atap aitqanda, kúndizgi sharalar ózdiginen qozǵala almaityn azamattarǵa baǵyttalyp otyr. Al saǵat 21-den 23-ke deiin túngi top jumys isteidi. Bul ýaqyt aralyǵynda kúndiz jumysta bolatyndyqtan ortalyqqa kele almaityn múgedek azamattarǵa em sharalary júrgiziledi. Jobanyń ereksheligi sol, mamandar patsientterdiń úiine baryp, olarǵa saýyqtyrý massajy men emdik dene shynyqtyrýyn jasatady. Ár seans shamamen bir saǵatty alady, ár patsientpen jeke jumys júrgiziledi. Kóshpeli brigada quramynda massajist, emdik dene shynyqtyrý nusqaýshysy men júrgizýshi bar. Bul rette mamandardyń jumysyna qolaily jaǵdai jasaý úshin arnaiy tańbalanǵan avtokólik satyp alynǵan.
Taldyqorǵandyq otbasylar kóshpeli ońaltý sharalarynyń igiligin alǵashqylardyń biri bolyp kórdi.
"Zaiybym Anar 11 jyl buryn insýlt aldy. Úshinshi qabatta turamyz, arnaiy kótergish joq bolǵandyqtan, syrtqa shyǵý, ońaltý ortalyǵyna barý bizge qiyndyq týǵyzady. Qazir úiimizge kelip, ońaltý qyzmetin kórsetip jatyr. Bul bizge óte qolaily. Mamandardyń tiisti em sharalaryn jasap jatqanyna on kúndei boldy. Osy bastamany iske asyryp jatqan azamattarǵa alǵys aitamyz", – dedi A. Basshyǵulovanyń jubaiy Qanat Qosýhanov.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ermek Mizambaevtyń aitýynsha, bul joba – teń múmkindikter qoǵamyn qalyptastyrýǵa jasalǵan igi sharanyń biri. Jyl sońyna deiin osyndai qyzmet túrimen 200-den astam adamdy qamtý josparlanǵan. Aldaǵy ýaqytta kóshpeli ońaltý toby oblys ortalyǵy mańyndaǵy aýdandarǵa da shyqpaqshy. Bul jobany júzege asyrýǵa jergilikti biýdjetten 30 mln. teńge bólingen. Bul qarajat jobaǵa tartylǵan mamandarǵa, iaǵni kólik júrgizýshi, emdik dene shynyqtyrý nusqaýshysy men massajist mamannyń jalaqysyna jumsalady.
Jalpy Jetisý oblysynda múgedek jandar úshin ǵimarattardy infraqurylymmen qamtamasyz etý 69% qurap otyr. Bul – respýblika boiynsha bul eń joǵarǵy kórsetkish. Biyl memlekettik jáne jekemenshik mekemelerdiń shamamen 195 nysanyn beiimdeý josparda bar. Oblys kóleminde qazir invataksi sany 32-ge jetti.
