جەتىسۋ وبلىسىندا تۇڭعىش رەت الەۋمەتتىك ماڭىزى بار جوبا – مۇگەدەك جانداردىڭ ۇيىندە كوشپەلى وڭالتۋ شارالارىن جۇرگىزۋ قولعا الىندى. اتالعان جوبا «اسار» مۇگەدەكتەرگە ارنالعان سپورتتىق-وڭالتۋ ورتالىعىنىڭ بازاسىندا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ قولداۋىمەن ۇيىمداستىرىلدى،- دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
«اسار» ورتالىعىنىڭ ديرەكتورى ەلدوس بايالىشبايەۆتىڭ ايتۋىنشا، بۇل جوبا ورتالىققا وزدىگىنەن كەلە المايتىندار ءۇشىن اسا پايدالى.
"ءبىز جۇمىس بارىسىندا مۇگەدەكتىگى بار ادامداردىڭ كوپشىلىگىنە وڭالتۋ ورتالىعىنا كەلۋدىڭ قيىندىق تۋعىزاتىنىن بايقادىق. كۇندىزگى ۋاقىتتا كەيبىرەۋلەر جۇمىستا بولسا، كەيبىرىنە ۇيلەرىنەن ورتالىققا جەتۋ وڭاي ەمەس. سوندىقتان ءبىز وسى كوشپەلى وڭالتۋ جوباسىن قولعا الدىق. ءبىزدىڭ بۇل ماڭىزدى باستامامىزعا وبلىس باسشىلىعى قولداۋ ءبىلدىردى"، - دەدى ەلدوس بايالىشبايەۆ.
جالپى باعدارلامادا پاسيەنتتەردىڭ ەكى توبى قامتىلۋدا. اتاپ ايتقاندا، كۇندىزگى شارالار وزدىگىنەن قوزعالا المايتىن ازاماتتارعا باعىتتالىپ وتىر. ال ساعات 21-دەن 23-كە دەيىن تۇنگى توپ جۇمىس ىستەيدى. بۇل ۋاقىت ارالىعىندا كۇندىز جۇمىستا بولاتىندىقتان ورتالىققا كەلە المايتىن مۇگەدەك ازاماتتارعا ەم شارالارى جۇرگىزىلەدى. جوبانىڭ ەرەكشەلىگى سول، ماماندار پاسيەنتتەردىڭ ۇيىنە بارىپ، ولارعا ساۋىقتىرۋ ماسساجى مەن ەمدىك دەنە شىنىقتىرۋىن جاساتادى. ءار سەانس شامامەن ءبىر ساعاتتى الادى، ءار پاسيەنتپەن جەكە جۇمىس جۇرگىزىلەدى. كوشپەلى بريگادا قۇرامىندا ماسساجيست، ەمدىك دەنە شىنىقتىرۋ نۇسقاۋشىسى مەن جۇرگىزۋشى بار. بۇل رەتتە مامانداردىڭ جۇمىسىنا قولايلى جاعداي جاساۋ ءۇشىن ارنايى تاڭبالانعان اۆتوكولىك ساتىپ الىنعان.
تالدىقورعاندىق وتباسىلار كوشپەلى وڭالتۋ شارالارىنىڭ يگىلىگىن العاشقىلاردىڭ ءبىرى بولىپ كوردى.
"زايىبىم انار 11 جىل بۇرىن ينسۋلت الدى. ءۇشىنشى قاباتتا تۇرامىز، ارنايى كوتەرگىش جوق بولعاندىقتان، سىرتقا شىعۋ، وڭالتۋ ورتالىعىنا بارۋ بىزگە قيىندىق تۋعىزادى. ءقازىر ۇيىمىزگە كەلىپ، وڭالتۋ قىزمەتىن كورسەتىپ جاتىر. بۇل بىزگە وتە قولايلى. مامانداردىڭ ءتيىستى ەم شارالارىن جاساپ جاتقانىنا ون كۇندەي بولدى. وسى باستامانى ىسكە اسىرىپ جاتقان ازاماتتارعا العىس ايتامىز"، – دەدى ا. باسشىعۇلوۆانىڭ جۇبايى قانات قوسۋحانوۆ.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامبايەۆتىڭ ايتۋىنشا، بۇل جوبا – تەڭ مۇمكىندىكتەر قوعامىن قالىپتاستىرۋعا جاسالعان يگى شارانىڭ ءبىرى. جىل سوڭىنا دەيىن وسىنداي قىزمەت تۇرىمەن 200-دەن استام ادامدى قامتۋ جوسپارلانعان. الداعى ۋاقىتتا كوشپەلى وڭالتۋ توبى وبلىس ورتالىعى ماڭىنداعى اۋداندارعا دا شىقپاقشى. بۇل جوبانى جۇزەگە اسىرۋعا جەرگىلىكتى بيۋدجەتتەن 30 ملن. تەڭگە بولىنگەن. بۇل قاراجات جوباعا تارتىلعان ماماندارعا، ياعني كولىك جۇرگىزۋشى، ەمدىك دەنە شىنىقتىرۋ نۇسقاۋشىسى مەن ماسساجيست ماماننىڭ جالاقىسىنا جۇمسالادى.
جالپى جەتىسۋ وبلىسىندا مۇگەدەك جاندار ءۇشىن عيماراتتاردى ينفراقۇرىلىممەن قامتاماسىز ەتۋ 69% قۇراپ وتىر. بۇل – رەسپۋبليكا بويىنشا بۇل ەڭ جوعارعى كورسەتكىش. بيىل مەملەكەتتىك جانە جەكەمەنشىك مەكەمەلەردىڭ شامامەن 195 نىسانىن بەيىمدەۋ جوسپاردا بار. وبلىس كولەمىندە ءقازىر ينۆاتاكسي سانى 32-گە جەتتى.
