Jetisýda «Bilim keleshegi: adal azamat, kásibi maman» oblystyq tamyz konferentsiiasy aiasynda óńirdegi muǵalimder, tárbieshiler, áleýmettik pedagogtar, bilim salasynyń damýyna úles qosqan basqa da salanyń qyzmetkerleri, demeýshiler men kásipkerler, basym bóligi bilim mekemelerindegi jumysshy mamandar – jalpy sany 90 adam marapattaldy. Taldyqorǵanda ótken konferentsiia jumysyna oblys ákimi Beibit Isabaev, QR Oqý-aǵartý ministrligi Balalardyń quqyqtaryn qorǵaý komitetiniń tóraǵasy Nasymjan Ospanova jáne óńirdiń pedagogtar qaýymy qatysty,- dep habarlaidy Dalanews.kz
Oblys basshysynyń aitýynsha, óńirde «Qazaqstannyń eńbek sińirgen ustazy» qurmetti ataǵyna ie bolǵan 6 pedagog bar. Solardyń arasynda jetisýlyq ustaz Lázzat Ispanova kúni keshe ǵana Prezident qolynan marapat alǵan bolatyn.
- Órkenietti, ozyq el bolamyz desek, eń aldymen ustazdarǵa qolaily jaǵdai jasap, olardyń áleýmettik mártebesin kóterýimiz kerek. Óitkeni sizder jas urpaqty tárbielep, memlekettiń damýyna zor úles qosyp kelesizder. Osy eseli eńbekterińiz úshin ustazdar qaýymyna shynaiy alǵysymdy bildiremin, - degen Beibit Isabaev budan ári marapattaý rásimin atqardy.
Atap aitqanda, «Qazaqstan Respýblikasynyń bilim berý isiniń qurmetti qyzmetkeri» tósbelgisimen Alakól, Eskeldi, Kerbulaq aýdandary men Taldyqorǵan qalasynyń 5 pedagogy, sol siiaqty Jetisý oblysy ákiminiń Qurmet gramotasynmen Aqsý, Kóksý, Sarqan, Panfilov aýdandary men Tekeli qalasynyń 5 pedagogy marapattaldy.
Budan bólek, oblys ákiminiń jáne Oqý-aǵartý ministrliginiń alǵys hattary bilim mekemelerinde eńbek etip júrgen 60-tan astam jumysshy mamanǵa, sol siiaqty bilim berý salasynyń damýyna úles qosqan basqa salanyń 20-ǵa jýyq qyzmetkerine berildi.
– Bizdiń kolledjde jiyrma jylǵa jýyq ýaqyttan beri jumys istep kelemin. Onyń on jylynda tazalyq pen tártipke jaýapty boldym, al sońǵy alty jyldan beri jataqhananyń komendanty qyzmetin atqaramyn. Tórt balam bar, otbasym únemi qoldaý kórsetedi. Búgingi tańda muǵalimdermen qatar qarapaiym eńbek adamdarynyń da eńbegi elenip jatqanyn kórý - úlken qýanysh. Sebebi ósip kele jatqan urpaqty tárbieleýde árqaisymyz óz úlesimizdi qosyp júrmiz dep oilaimyn, – dedi QR Oqý-aǵartý ministrliginiń Alǵys hatymen marapattalǵan Taldyqorǵan indýstrialdy kolledjiniń jataqhana komendanty Baqytjan Ábeýova.
Taldyqorǵan qalasyndaǵy №2 balabaqshanyń aspazy Nadejda Mamaeva da osyndai pikirde. Ol Tamyz konferentsiiasynda oblys ákiminiń Alǵys hatymen marapattaldy.
– Meniń aspaz kásibine kelgenime 30 jyldan asty, sonyń ishinde Taldyqorǵandaǵy №2 balabaqshada jumys istegenime 20 jyl. Eńbegińniń elengeni mereiińdi ósiredi. Búgin oblys ákimi balalarǵa sapaly tamaq berýdi uiymdastyrýdyń mańyzdylyǵyn atap ótti. Rasynda bul – ult densaýlyǵyna tikelei áser etetin jait. Sondyqtan balalarymyz dámdi ári paidaly taǵam iship-jesin dep jumysyma barynsha yjdahatty qaraimyn, – deidi N.Mamaseva.
Marapattalýshylardyń biri alakóldik ustaz da óziniń jyly lebizin bildirdi.
- Búgin Tamyz konferentsiiasyna qatysyp shyqtyq. Jiynda kóptegen jaqsy jańalyqtar aityldy. Meniń pedagogikalyq eńbek ótilim 38 jyl, sonyń 16 jylynda mektepti basqardym. Uzaq jyl bastaýysh synyptyń muǵalimi boldym. Búgin «Qazaqstan Respýblikasynyń bilim berý isiniń qurmetti qyzmetkeri» tósbelgisin aldym. Bul meni jastardy tárbieleý jolynda budan ári de qajyrly eńbektenýge qanattandyrady, - deidi Úsharal qalasy Ybyrai Altynsarin atyndaǵy mektep-gimnaziiasynyń direktory Galima Hasenova.
Atap ótsek, búgin jyl saiynǵy pedagogtardyń Tamyz konferentsiiasy aiasynda Jetisýda bilim salasyn damytýdyń ózekti máseleleri, atap aitqanda Prezidenttiń alǵa qoiǵan bilim sapasyn kóterý, inkliýzivti oqytý, jas urpaqty tárbieleý, olardy áleýmettik keselderden saqtaý, salany tsifrlandyrý jáne muǵalimniń mártebesin kóterý mindetterin iske asyrý joldaryn talqylaǵan bolatyn.
