Jastar sport mekemeleriniń ákimshilik qyzmetkerlerine jalaqyny zańsyz arttyrý nátijesinde memleketke 604,6 million teńge kóleminde shyǵyn kelgen, dep habarlaidy Dalanews.kz.
Sybailas jemqorlyqqa qarsy is-qimyl agenttiginiń Jetisý oblysy boiynsha departamentiniń basshysy Saian Ahmetjanovtyń aitýynsha, sport salasyna bólingen qarjyny igerý barysynda birqatar zańbuzýshylyqtar oryn alǵan. Ákimshilik qyzmetkerler men jattyqtyrýshylar negizsiz ústeme qarjy alyp kelgen.
"Sport klýbtarynyń ákimshilik qyzmetkerlerine olardyń laýazymdyq qyzmetine sáikes kelmeitin jalaqy tólengen. Bul soma 604,6 million teńgege jetken. Buǵan qosa, zańsyz taǵaiyndalǵan syiaqylar da anyqtaldy. Reviziialyq komissiia qazirgi tańda 737 million teńgeni memleketke qaitarý týraly sheshim qabyldady," – dedi Saian Ahmetjanov.
Sondai-aq, sportty damytý direktsiiasy arqyly chempiondarǵa kóterme syiaqy retinde bólingen 84 million teńge de zańsyz dep tanylyp, qysqartylǵan.
"Bizdiń usynystarymyz negizinde jergilikti atqarýshy organ eńbekaqy qoryn qaita qarap, ony QR PP №1193 standarttaryna sáikestendirdi," – dep tolyqtyrdy Ahmetjanov.
Qazirgi ýaqytta qarjynyń maqsatty jáne zańǵa sáikes paidalanylýyn qamtamasyz etý boiynsha jumystar jalǵasýda.
