Jetisý oblysynyń shalǵaı aýyldardaǵy mektepterge 8 jańa avtobýs berildi. Bul jańa kólikter oqýshylardy tasymaldaýdyń qolaılylyǵyn qamtamasyz etetin bolady,- dep habarlaıdy Dalanews.kz

Atap aıtqanda, Eskeldi aýdanynyń Baqtybaı jáne Aldabergenov aýyldaryna, Qaratal aýdanynyń Kókpekti, Kerbulaq aýdanynyń Shanhanaı, Sarybulaq, Saryózek aýyldaryna, Kóksý aýdanynyń Balpyq bı aýylyna, Sarqan aýdanynyń Cherkassk aýylyna mektepterge avtobýstar kiltin oblystyq bilim basqarmasynyń basshysy Dáýren Júnisov saltanatty túrde tabystady. Ol óz sózinde balalardyń bilimge qoljetimdiligin arttyrý basty mindet ekenin tilge tıek etip, jańa avtobýstarmen qamtý balalardyń men qaýipsizdigin qamtamasyz etýge baǵyttalǵan mańyzdy qadam ekenin atap ótti.

- Bizdiń mektepte 122 oqýshy bar, sonyń 15-i Aqqaıyń aýylynan kelip oqıdy. Buǵan deıin oqýshylardy tasymaldaıtyn eski avtobýsymyz bolǵan. Endi onyń ornyna jańa, zamanaýı, qolaıly avtobýs berildi. Bul jaılylyq qana emes, balalardyń qaýipsizdigi úshin de mańyzdy, - dep atap ótti Cherkassk orta mektebiniń dırektory Baýyrjan Ibraımova.

Bul avtobýstar otandyq óndirýshi «Daewoo Bus Kazakhstan» JSHS zaýytynda jasap shyǵarylǵan. Avtobýstarda qaýipsizdik beldikteri, aýa salqyndatý júıesi, dybys zoraıtqysh, sıgnal túımesi bar. Sol sıaqty dári qobdıshasymen, órt sóndirgish jáne avarıalyq belgilermen jabdyqtalǵan.

Jalpy Jetisý oblysynyń mektepterinde 94 avtobýs oqýshylar tasymalyna qyzmet kórsetedi. Bul avtobýstarmen 87 eldi mekenniń 2513 oqýshysy tasymaldanady.