Jetisý oblysynda kúrish jinaý naýqany bastaldy. Jalpy Jetisý óńirinde kúrish daqyly tek Qaratal aýdanynda ósiriledi. Biyl 3 myńnan astam tonna ónim jinaý kózdelgen, bul rette ortasha ónimdiligi 32,88 ts/ga qurap otyr, dep habarlaidy Dalanews.kz.
Oblystyq aýyl sharýashylyǵy basqarmasynyń málimetinshe, aýdanda kúrish ósirýmen 5 aýyl sharýashylyǵy sýbektisi ainalysady. Solardyń ishinde Qaratal aýdanynyń kúrish sharýashylyǵynda kósh bastap turǵan «Opytnoe» óndiristik aýyl sharýashylyǵy kooperativi de bar. Kooperativ soia, júgeri, kúrish, jońyshqa ósirip otyr.
Egis jinaý naýqanynyń barysy jaily kooperativ jetekshisi Erjan Qaisanov aityp berdi.
– Biyl biz kúrishtiń «Iantar» tuqymyn 350 gektar jerge septik. Bul tuqymnyń artyqshylyǵy – bizdiń topyraqqa barynsha beiimdelgen jáne aýa raiy men sý jaǵdaiyna tózimdiligi joǵary. Ázirge ónim shyǵymy týraly naqty aitýǵa áli erte, degenmen jalpy aiaq alysymyz jaqsy, úmitimiz zor. Qazirgi kezde 70 gektar alqaptaǵy kúrish shabyldy, endi ony jinap alamyz. Jumystar josparǵa sai júrip jatyr, qyrkúiek aiynyń sońyna deiin aiaqtaimyz dep josparlap otyrmyz. Qazir alqapta 20 adam jumys istep jatyr, 15 tehnika tartylǵan, – degen diqan memleket tarapynan qajetti qoldaý kórsetilip jatqanyn da atap ótti. Aýyl sharýashylyǵy tehnikasy lizing arqyly alynǵan, janar-jaǵarmai arzandatylǵan baǵamen berilýde, tuqym, tyńaitqysh, gerbitsidke sýbsidiia qarastyrylǵan, - deidi ol.
Aita keteiik, Qaratal aýdanynda kúrish sharýashylyǵyn damytýǵa arnap qurylǵan servistik-daiyndaý ortalyǵy jumys isteidi. Onda astyq jáne kúrish jinaityn kombaindardy qosqanda jalpy sany 10 arnaiy tehnika bar.
Egin jinaýdyń erekshelikteri jaily sharýashylyq traktorshysy Hasan Ibo-oǵly baiandady.
– Kúrish jinaýdyń óz ereksheligi bar. Ony ýaqytynda bastaý kerek: dán tolyq pisip, biraq túsip te qalmaityndai, artyq ylǵal da jinap úlgermeitindei kezeńdi dóp basý qajet. Sol sebepti alqap aldyn ala qurǵatylady, sý birtindep aǵyzylady, bul tehnikanyń batpaqqa batyp qalmaýy úshin jasalady. Biz egistikke tańǵy saǵat 7-de kelip, jumysty ińir túse aiaqtaimyz. Túski asty bizge tikelei alqapqa ákelip beredi. Jumystan sharshaǵanymyzdy da baiqamaimyz. Isimiz ońynan bolyp, kúnimizdiń tekke ótpegenin sezingen kezde boiymyzdy bir rizashylyq sezimi bileidi. Bul – eńbektiń rahaty ǵoi dep oilaimyn, – deidi traktorshy.
Atap ótsek, osy jyly kúrish jalpy 951 gektarǵa egilgen. Kútiletin jalpy ónim – 3127 tonna, ortasha ónimdilik – 32,88 ts/ga.
Eske salaiyq, biylǵy jyly Jetisý oblysynda aýyl sharýashylyǵy daqyldarynyń, atap aitqanda dándi jáne maily daqyldar, mal azyǵy daqyldary, qant qyzylshasy, kartop, kókónister men baqsha daqyldary jáne basqa da egin túrleriniń jalpy alańy 510,7 myń gektardy qurady. Agroónerkásip keshenin qoldaýǵa biyl 41,7 mlrd teńge baǵyttaldy, onyń 24,1 mlrd teńgesi – sýbsidiia.
