جەتىسۋ وبلىسىندا كۇرىش جيناۋ ناۋقانى باستالدى. جالپى جەتىسۋ وڭىرىندە كۇرىش داقىلى تەك قاراتال اۋدانىندا وسىرىلەدى. بيىل 3 مىڭنان استام توننا ءونىم جيناۋ كوزدەلگەن، بۇل رەتتە ورتاشا ونىمدىلىگى 32،88 س/گا قۇراپ وتىر، دەپ حابارلايدى Dalanews.kz.
وبلىستىق اۋىل شارۋاشىلىعى باسقارماسىنىڭ مالىمەتىنشە، اۋداندا كۇرىش وسىرۋمەن 5 اۋىل شارۋاشىلىعى سۋبەكتىسى اينالىسادى. سولاردىڭ ىشىندە قاراتال اۋدانىنىڭ كۇرىش شارۋاشىلىعىندا كوش باستاپ تۇرعان «وپىتنوە» وندىرىستىك اۋىل شارۋاشىلىعى كووپەراتيۆى دە بار. كووپەراتيۆ سويا، جۇگەرى، كۇرىش، جوڭىشقا ءوسىرىپ وتىر.
ەگىس جيناۋ ناۋقانىنىڭ بارىسى جايلى كووپەراتيۆ جەتەكشىسى ەرجان قايسانوۆ ايتىپ بەردى.
– بيىل ءبىز كۇرىشتىڭ «يانتار» تۇقىمىن 350 گەكتار جەرگە سەپتىك. بۇل تۇقىمنىڭ ارتىقشىلىعى – ءبىزدىڭ توپىراققا بارىنشا بەيىمدەلگەن جانە اۋا رايى مەن سۋ جاعدايىنا توزىمدىلىگى جوعارى. ازىرگە ءونىم شىعىمى تۋرالى ناقتى ايتۋعا ءالى ەرتە، دەگەنمەن جالپى اياق الىسىمىز جاقسى، ءۇمىتىمىز زور. قازىرگى كەزدە 70 گەكتار القاپتاعى كۇرىش شابىلدى، ەندى ونى جيناپ الامىز. جۇمىستار جوسپارعا ساي ءجۇرىپ جاتىر، قىركۇيەك ايىنىڭ سوڭىنا دەيىن اياقتايمىز دەپ جوسپارلاپ وتىرمىز. ءقازىر القاپتا 20 ادام جۇمىس ىستەپ جاتىر، 15 تەحنيكا تارتىلعان، – دەگەن ديقان مەملەكەت تاراپىنان قاجەتتى قولداۋ كورسەتىلىپ جاتقانىن دا اتاپ ءوتتى. اۋىل شارۋاشىلىعى تەحنيكاسى ليزينگ ارقىلى الىنعان، جانار-جاعارماي ارزانداتىلعان باعامەن بەرىلۋدە، تۇقىم، تىڭايتقىش، گەربيسيدكە سۋبسيديا قاراستىرىلعان، - دەيدى ول.
ايتا كەتەيىك، قاراتال اۋدانىندا كۇرىش شارۋاشىلىعىن دامىتۋعا ارناپ قۇرىلعان سەرۆيستىك-دايىنداۋ ورتالىعى جۇمىس ىستەيدى. وندا استىق جانە كۇرىش جينايتىن كومباينداردى قوسقاندا جالپى سانى 10 ارنايى تەحنيكا بار.
ەگىن جيناۋدىڭ ەرەكشەلىكتەرى جايلى شارۋاشىلىق تراكتورشىسى حاسان يبو-وعلى باياندادى.
– كۇرىش جيناۋدىڭ ءوز ەرەكشەلىگى بار. ونى ۋاقىتىندا باستاۋ كەرەك: ءدان تولىق ءپىسىپ، ءبىراق ءتۇسىپ تە قالمايتىنداي، ارتىق ىلعال دا جيناپ ۇلگەرمەيتىندەي كەزەڭدى ءدوپ باسۋ قاجەت. سول سەبەپتى القاپ الدىن الا قۇرعاتىلادى، سۋ بىرتىندەپ اعىزىلادى، بۇل تەحنيكانىڭ باتپاققا باتىپ قالماۋى ءۇشىن جاسالادى. ءبىز ەگىستىككە تاڭعى ساعات 7-دە كەلىپ، جۇمىستى ءىڭىر تۇسە اياقتايمىز. تۇسكى استى بىزگە تىكەلەي القاپقا اكەلىپ بەرەدى. جۇمىستان شارشاعانىمىزدى دا بايقامايمىز. ءىسىمىز وڭىنان بولىپ، كۇنىمىزدىڭ تەككە وتپەگەنىن سەزىنگەن كەزدە بويىمىزدى ءبىر ريزاشىلىق سەزىمى بيلەيدى. بۇل – ەڭبەكتىڭ راحاتى عوي دەپ ويلايمىن، – دەيدى تراكتورشى.
اتاپ وتسەك، وسى جىلى كۇرىش جالپى 951 گەكتارعا ەگىلگەن. كۇتىلەتىن جالپى ءونىم – 3127 توننا، ورتاشا ونىمدىلىك – 32،88 س/گا.
ەسكە سالايىق، بيىلعى جىلى جەتىسۋ وبلىسىندا اۋىل شارۋاشىلىعى داقىلدارىنىڭ، اتاپ ايتقاندا ءداندى جانە مايلى داقىلدار، مال ازىعى داقىلدارى، قانت قىزىلشاسى، كارتوپ، كوكونىستەر مەن باقشا داقىلدارى جانە باسقا دا ەگىن تۇرلەرىنىڭ جالپى الاڭى 510،7 مىڭ گەكتاردى قۇرادى. اگروونەركاسىپ كەشەنىن قولداۋعا بيىل 41،7 ملرد تەڭگە باعىتتالدى، ونىڭ 24،1 ملرد تەڭگەسى – سۋبسيديا.
