Jetisý oblysynyń qurylǵanyna úsh jyl tolýyna orai óńirde jańa sý elektr stantsiiasy paidalanýǵa berildi. Qora ózeninde salynǵan bul GES – óńirdegi jańartylǵan energiia kózderiniń 18-shi nysany. Jańa GES-tiń jyldyq qýaty 26 MVt,- dep habarlaidy Dalanews.kz
Eskeldi aýdanynyń Qora ózenindegi GES-3 nysanyn iske qosý saltanatynda aldymen stantsiia qurylysy týraly film kórsetilip, QR Energetika ministriniń orynbasary Suńǵat Esimhanovtyń beinequttyqtaýy berildi. Sondai-aq is-sharaǵa qatysqan oblys ákiminiń orynbasary Áset Qanaǵatov oblystyń qurylǵanyna 3 jyl tolýyna jáne jańa nysannyń ashylýyna orai quttyqtaý tilegin bildirdi.
- Qora ózenindegi GES-3 nysanyn paidalanýǵa berý – Qazaqstannyń energetika salasyn damytýdaǵy aýqymdy strategiianyń bir bóligi. Jalpy gidroenergetika eldiń energetikalyq qaýipsizdigin qamtamasyz etýde sheshýshi ról atqaryp, parniktik gazdar shyǵaryndylaryn azaitýǵa qol jetkizýge yqpal etedi. Sondyqtan bul nysan – senimdi energiia kózi ǵana emes, sonymen qatar ekologiiany saqtaýǵa degen mańyzdy qadam. Qora ózenindegi GES-3 jobasy infraqurylymdy damytýǵa jáne jergilikti halyqtyń ómir súrý sapasyn arttyrýǵa yqpal etedi dep senemiz. Sý elektr stantsiiasynyń jumysy jemisti bolyp, óńirimizdiń damýyna úles qosýyna tilektespin, - dedi Á. Qanaǵatov.
Óz kezeginde jobany júzege asyrýshy «Qora GES-2» JShS-nyń direktory M.Týkenov pen quryltaishysy «ASPMK-519» JShS bas direktory A. Sychov sóz sóilep, atqarýshy organ men biznestiń áriptestigi, kásipkerlik salasyna kórsetilip otyrǵan qoldaýlar jaily aityp, energetika salasyn damytýǵa árdaiym daiyn ekendikterin jetkizdi.
«Oblystyń 3 jyldyǵyna syi retinde búgin Qurban ait merekesinde Tekeli qalasyndaǵy saiabaqty rekonstrýktsiiadan ótkizýge 50 mln. teńge bóletinimizdi jetkizgim keledi. Biz biznestiń áleýmettik jaýapkershiligin esten shyǵarmaimyz», - dedi ol.
Munan soń qyzyl tetik basylyp, GES simvoldyq túrde iske qosyldy. Resmi qonaqtar GES-tiń jumys protsesimen tanysyp, ishin aralap kórdi.
GES bastyǵy Iliias Hamitovtiń aitýynsha, jobaǵa 10,5 mlrd. teńge jeke investitsiia tartylyp, 21 turaqty jumys orny quryldy.
- Bul stantsiiada mamandar táýlik boiy eki aýysymmen jumys isteidi. Jumys negizinen avtomattandyrylǵan. Mamandar tek qondyrǵylardyń jumysyn baqylap otyrady. Stantsiiada Avstriiada jasalǵan gidroagregat qondyrǵylary ornatylǵan. Qazirgi kezde avstriialyq mamandar eki jyldyq servistik qyzmet aiasynda qondyrǵylardyń durys jumys jasaýyn qashyqtan qadaǵalap otyr. Ary qarai ózimizdiń mamandar jumysty tolyqtai ózderi júrgizedi. Jalpy bul GES elektr energiiasyna jyl saiyn artyp kele jatqan qajettilikti qamtamasyz etýge, elektrmen jabdyqtaýdyń senimdiligi men sapasyn arttyrýǵa, ekologiialyq jaǵdaidy jaqsartýǵa, sol siiaqty jańa jumys oryndaryn ashý arqyly halyqtyń ál-aýqatyn kóterýge yqpal etedi, - deidi GES bastyǵy.
Jańa nysanǵa turaqty jumysqa ornalasqan mamandardyń biri - tekelilik Ashat Hamitov.
- Ózim Tekeli qalasynda turamyn. Tekeli qalasynyń kásiptik kolledjin bitirdim. Kolledjdi bitirgen soń birden «Qora GES-2» JShS-ǵa jumysqa turyp, bir jyldan beri osynda eńbek etemin. Osy óńirden óz mamandyǵym boiynsha jumys tabylǵanyna qýandym. Munda girdotehnika qondyrǵylarynyń slesarimin. Maǵan óz jumysym unaidy. Jas maman retinde tájiribe jinap, kóp nárse úirendim, - deidi A. Hamitov.
Qazirgi kezde oblysta Aqsý, Alakól, Eskeldi, Qaratal, Sarqan aýdandary men Tekeli qalasynda belgilengen qýattylyǵy 225,4 MVt bolatyn jalpy sany 17 jańartylǵan energiia kózderi (JEK) nysany jumys isteidi. Búgingi ashylǵan stantsiia – óńirdegi 18-shi GES. Jyl sońyna deiin belgilengen qýattylyǵy 20,6 MVt bolatyn, jalpy quny 10,4 mlrd. teńgelik 2 sý elektr stantsiiasynyń jobasyn aiaqtaý josparlanýda.
Atap ótsek, jyl basynan beri Jetisý oblysynda óndirilgen elektr energiiasy 247,3 mln. kVt/saǵ, onyń ishinde JEK úlesi – 191,8 mln.kVt / saǵ, bul ótken jyldyń osy kezeńimen salystyrǵanda 16%-ǵa artyq.
