Jetisý oblysynda ańshylyq kezinde oqys oqiǵa bolyp, saldarynan bir adam aýrýhanaǵa túsken, dep habarlaidy Dalanews.kz.
Oqiǵamen jaqsy tanys derekkózderdiń biri Dalanews.kz-ke jábirlenýshi áskeri adam ekenin aitty.
Jetisý oblysy Politsiia departamenti bul aqparatty rastady. Vedomstvo málimetinshe, oqiǵaǵa qatysqandardyń bireýi ǵana áskeri qyzmetker. Bul jait demalys kúni, jumys ýaqytynan tys kezde bolǵan.
"Abaisyzda aýyr dene jaraqatyn keltirý deregi boiynsha politsiia qylmystyq is qozǵady. Oqiǵanyń mán-jaiy anyqtalyp jatyr. Aldyn ala málimet boiynsha bul oqiǵa ańshylyq kezinde bolǵan. Kúdikti ustalyp, ýaqytsha ustaý izoliatoryna qamaldy. Tergeý múddesine bailanysty ózge aqparat jariia etilmeidi", - dedi óńir politsiiasy.
Al Qorǵanys ministrliginiń resmi ókili Áigerim Aǵyltaeva Dalanews.kz-ke bergen jaýabynda "áskeriler arasynda atys boldy" degen aqparat shyndyqqa janaspaitynyn málimdedi.
