Jetisý oblysy Kerbulaq aýdanynyń ákimi Qanat Esbolatov Respýblıka kúni qarsańynda balabaqsha tárbıeshisi Galına Demınaǵa joq úıdiń kiltin tabys etken, dep habarlaıdy Dalanews.kz.

İs-shara barysynda aýdan ákimi zeınetkerge  quny 8,7 mıllıon teńge turatyn úıdiń kiltin saltanatty túrde tabystaǵan. Alaıda birneshe jyldan beri úıli bolýdy armandaǵan Galına Demınanyń qýanyshy kópke sozylmaǵan.

Sebebi saltanatty tabystaý rásimi ótkennen keıin ákimdik oǵan úıdiń joq ekenin jetkizgen.

Ákimdik Demınaǵa óz betinshe turǵyn úı tabýdy usynǵan. Zeınetkerdiń sózinshe, olar basynda bergen ýádesinen taıǵan.

“Merekelik sharada maǵan úıdiń kiltin tabystady. Qýanyshtan kóz jasyma erik berdim. Biraq demalystan keıin qýanyshym sý sepkendeı basyldy. Olar maǵan úıdiń joq ekenin aıtty”, - deıdi ol.

Onyń sózinshe, ákimdik baspanany 8,7 mıllıonǵa emes, 3,8 mıllıon teńgege taýyp kelýin eskertken. 

“Úıdi ózim izdedim. Búkil aýyldy aralap, bul somaǵa eshteńe taba almadym”, - deıdi Galına.

Ákimdik zeınetkerge eki apta buryn baspana máselesin sheship berýge sóz bergen kórinedi. Ókinishke qaraı, sodan beri únsiz qalǵan.